Миср соғлиқни сақлаш ва аҳоли вазирлиги мамлакатга ҳаво, денгиз портлари ва қуруқликдаги чегара ўтказиш пунктлари орқали кириш тартиби тўғрисидаги янгиланишни эълон қилди. Бу ҳақда Ўзбекистоннинг Қоҳирадаги элчихонаси маълумотларига таяниб, Ташқи ишлар вазирлиги хабар қилди.
Қайд этилишича, 22 январдан бошлаб Мисрга борувчи барча фуқаролар (12 ёшгача бўлган болалар бундан мустасно) Жаҳон соғлиқни сақлаш ташкилоти ёки мамлакат Дори-дармон агентлиги томонидан тасдиқланган коронавирусга қарши вакцина билан эмланганлик сертификатларини тақдим этиши шарт.
Шу билан бирга, Sinopharm, Sinovac, AstraZeneca, «Спутник V», Moderna, Pfizer ва Johnson & Johnson вакциналари Мисрнинг ўзида фавқулодда фойдаланиш учун рўйхатга олинган.
Эмлаш сертификатида ташриф буюрувчи келишидан камида 14 кун олдин вакцинанинг бир дозаси ёки икки марталик вакцинанинг охирги дозасини олганини кўрсатиши керак. Эмлаш сертификати бўлмаса, салбий коронавирус тести (ПЗР-тести ва бошқалар) тақдим этилиши керак. Шу билан бирга, Жанубий Африка, Ботсвана, Мозамбик, Намибия, Лесото, Зимбабве ва Эсватинидан келганлар ПЗР-тестини ёки тезкор антиген тестини тақдим этиши лозим.
Коронавирусга қарши эмлаш сертификатлари ёки тестлари Миср стандартларига жавоб бермаса, келгандан кейин тезкор тест талаб қилинади. Коронавирус учун ижобий натижа аниқланган тақдирда, келган шахслар меҳмонхонада ёки турар жойида беш кунлик карантиндан ўтиши керак. Инфекция юқтирганлар олтинчи куни ПЗР-тестини ўтказади ва касаллик белгилари бўлмаса, улар ўз-ўзини изоляция қилиши мумкин.
Шу муносабат билан, Мисрга боришни режалаштираётган Ўзбекистон фуқароларидан ҳам янгиланган эпидемияга қарши стандартларга эътибор қаратиши ҳамда борган давлатида амалдаги профилактика чораларига риоя этиши сўралган.
Изоҳ (0)