22 январь куни эрта тонгда Умра—2022 мавсумининг илк зиёратчилари Тошкент халқаро аэропортидан Саудия Арабистонига жўнаб кетди, деб хабар беради Ўзбекистон мусулмонлари идораси.
Таъкидланишича, зиёратчиларни кузатиш учун таниқли уламолар, имом-домлалар, мутасаддилар ва ОАВ вакиллари Тошкент халқаро аэропортида тўпланган.
«Муборак сафарга отланган ҳамюртларимизнинг кўзларида қувонч, тилларида шукроналик сўзлари сира аримаганига гувоҳ бўлдик. Кузатиш жараёнида Аллоҳ таолонинг байти сари йўл олаётган зиёратчилар эсон-омон муборак қадамжоларни зиёрат қилиб келишлари, ушбу зиёратни юртимиз ва бутун дунё мусулмонларга бардавом қилишини сўраб хайрли дуолар қилинди», — дейилади хабарда.
Аввалроқ Ўзбекистонда Умра зиёрати қачондан бошланиши ва унинг нархлари ҳақида маълумот берилганди. Унда 2020 йил февраль ойига қадар Умра зиёрати учун охирги белгиланган тўловларни амалга оширганлар қўшимча равишда 4 770 000 сўм маблағ тўлаши ҳам келтириб ўтилган эди. Ижтимоий тармоқларда ушбу қўшимча тўлов борасида турли мулоҳазалар билдирилганидан сўнг, Мусулмонлар идораси ҳолатга изоҳ бериб, коронавирус пандемияси умра хизматлари кўрсатишга ҳам салбий таъсир кўрсатганини маълум қилди. Қайд этилишича, меҳмонхонада 4 кишилик хонага 2 нафар зиёратчи, 50 ўриндиқли автобусга 25 киши жойлаштириш каби талаблар ўрнатилган.
Эслатиб ўтамиз, Саудия Арабистони ҳукумати чет элликлар кичик ҳаж — Умра зиёратини амалга ошириш учун 10 августдан қиролликка кириши мумкинлигини эълон қилган эди. Зиёратчилар қиролликда тасдиқланган Pfizer, Moderna, Johnson & Johnson, AstraZeneca вакциналаридан бири билан эмланган бўлиши ёки манфий жавобли ПЗР-тестни тақдим этиши керак. Вакцина олмаган зиёратчилар мамлакатга келганидан кейин уч кунлик карантиндан ўтиб, сўнг коронавирусга нисбатан қайтадан ПЗР-тест топширади.
Саудия Арабистони ҳукумати Хитой вакциналарини ҳам тан олади, аммо тўлиқ эмлангандан кейин Pfizer, Moderna, Johnson & Johnson ёки AstraZeneca вакцинаси билан бустер дозасини (вакцинациядан олти ой ўтиб киритиладиган қўшимча доза) олиши керак бўлади.
Изоҳ (0)