Андижон вилоятининг Қўрғонтепа туманида ўзганинг уйига ўғирликка тушиб, хонадон эгасининг пулларини ўмарган шахслар ушланди, деб хабар беради Тергов департаменти.
Маълум қилинишича,16 январь куни соат 11:00 ларда вояга етмаганлар — 16 ёшли Ю.Х. ва 15 ёшли Н.А. туманнинг Ифтихор кўчасида яшовчи 25 ёшли М.Ф.нинг яшаш хонадонига дарвозаси очиқлигидан фойдаланиб, ғайриқонуний равишда кирган.
Улар хонадон ётоқхонасидаги шкаф ичида бўлган 2,5 минг доллар ва 8,57 миллион сўм пулларни яширин равишда ўғирлаб, ҳодиса жойидан яширинаётган вақтида ушбу манзилда хизмат олиб бораётган Қўрғонтепа тумани ИИБ ҲПБ профилактика инспектори томонидан ушланган. Йигитлардан ашёвий далил тариқасида пуллар расмийлаштириб олинган.
Мазкур ҳолат юзасидан Қўрғонтепа туман ИИБ ҳузуридаги тергов гуруҳи томонидан вояга етмаганлар Ю.Х. ва Н.А.га нисбатан Жиноят кодексининг 169-моддаси 2-қисми «б,в,г» бандлари (ўғирлик) билан жиноят иши қўзғатилган. Ҳозирда тергов ҳаракатлари давом этмоқда.
Аввалроқ Бухорода 8-синф ўқувчиси қўшнисининг қарийб 5 млн сўмлик буюмларини ўғирлагани, Тошкентдаги бозордан 280 минг сўмлик буюмларни ўғирлаган тўрт аёл қўлга олингани, Наманганда 15 ёшли қизлар ўзганинг кир машинасини жабрланувчининг уйидаёқ сотиб юборгани тўғрисида хабар берилганди.
Изоҳ (0)