Улуғбек Муҳаммадиев президентнинг фуқаролар ҳуқуқларини ҳимоя қилиш ва мурожаатлар билан ишлаш масалалари бўйича маслаҳатчисининг биринчи ўринбосари лавозимига тайинланди. Бу ҳақда «Нигоҳ» хабар берди.
Қайд этилишича, шу муносабат билан у Адлия вазирлиги ҳузуридаги Давлат хизматлари агентлиги директори лавозимидан озод этилган.
Эслатиб ўтамиз, Улуғбек Муҳаммадиев 2020 йил июль ойигача ҳам фуқаролар ҳуқуқларини ҳимоя қилиш ва мурожаатлар билан ишлаш масалалари бўйича маслаҳатчисининг биринчи ўринбосари лавозимида ишлаган. Сўнг Давлат хизматлари агентлиги директори этиб тайинланганди.
Улуғбек Муҳаммадиев 1977 йилда Тошкент шаҳрида туғилган, маълумоти олий, 1999 йилда Тошкент давлат университети (кундузги), 2003 йилда Ўзбекистон Миллий университети (сиртқи)ни тамомлаган, мутахассислиги математик, ҳуқуқшунос.
У ўз меҳнат фаолиятини 2001 йилда Ўзбекистон президентининг ҳуқуқни муҳофаза қилувчи ва назорат идоралари фаолиятини мувофиқлаштириш бўйича Давлат маслаҳатчиси хизматининг иш юритувчиси лавозимидан бошлаган.
Изоҳ (0)