Президент Шавкат Мирзиёев 13 январь куни «Самарқанд давлат университети фаолиятини янада такомиллаштиришга доир қўшимча чора-тадбирлар тўғрисида»ги қарорни имзолади, деб хабар беради «Yuz.uz».
Ҳужжатга кўра, Самарқанд давлат университетига атоқли давлат ва жамоат арбоби Шароф Рашидов номи берилди.
Қарор билан университетни трансформация қилиш ва комплекс ривожлантириш дастурини амалга ошириш ҳамда 2026 йилга қадар халқаро тан олинган ташкилотларнинг олий таълим муассасалари рейтингида биринчи 1000 талик рўйхатга киритиш вазифаси қўйилган.
Университетда трансформация қилиш ва комплекс ривожлантириш дастурини амалга ошириш, рақамлаштириш ҳамда таълим жараёнига замонавий педагогик технологияларни жорий этиш, университетни танитиш бўйича миллий ва хорижий оммавий ахборот воситалари, интернет тармоғи ва бошқа воситалар орқали тарғибот тадбирларини ўтказувчи Трансформация офиси ташкил этилади.
Университет таркибида қуйидагилар ташкил этилади:
- агрономия, биотехнология ва озиқ-овқат хавфсизлиги соҳаларида кадрлар тайёрловчи Агробиотехнологиялар ва озиқ-овқат хавфсизлиги институти;
- муҳандислик, автоматика, мехатроника, робототехника, рақамли электроника, электротехника, машинасозлик, материалшунослик ва янги материаллар технологияси соҳаларида кадрлар тайёрловчи Муҳандислик физикаси институти;
- педагогика, ахборот технологиялари ва ҳудудда кадрларга эҳтиёж юқори бўлган бошқа соҳаларда кадрлар тайёрловчи университетнинг Ургут филиали.
Изоҳ (0)