O‘zbekistonda 2021-yil yakunlariga ko‘ra, “Avtoraqam.uzex.uz” veb-sayti orqali 298,8 milliard so‘mlik 139,4 mingdan ziyod avtoraqamlar shaffof onlayn auksionlar orqali sotildi. Bu haqda Respublika tovar-xomashyo birjasi xabar berdi. Avtoraqamlarning sotuvi son jihatdan 40 foizga, hajmi bo‘yicha — 21 foizga o‘sgan.
Ma’lum qilinishicha, tuzilgan bitta bitimning o‘rtacha qiymati 2,1 million so‘mni tashkil etgan. Sotilgan avtoraqamlarning 91 foizi jismoniy shaxslar, 9 foizi esa yuridik shaxslar tomonidan xarid qilingan. O‘tgan davrda sotilgan avtoraqamlarning eng past bahosi — 450,5 ming so‘mni, eng qimmat avtoraqamning qiymati esa 441,5 million so‘mni tashkil qilgan.
Raqobatli savdolar natijasida bitimlarning 37 foizi birinchi toifadagi avtoraqamlar, 22 foizi – ikkinchi, 13 foizi – uchinchi, 9 foizi – to‘rtinchi, 9 foizi – beshinchi va 10 foizi – oltinchi toifa avtoraqamlarga to‘g‘ri kelgan.
Hududlar kesimida eng ko‘p avtoraqamlar Toshkent shahri va Toshkent viloyati (48 foiz) Samarqand va Farg‘ona (8 foizdan), Namangan va Andijon (6 foizdan) hamda Buxoro (5 foiz) viloyatlarida xarid qilingan.
Eslatib o‘tamiz, avtoraqamlarning onlayn auksionlarda sotilishidan kelib tushgan mablag‘larning 80 foizi – davlat budjetiga, 20 foizi – Ichki ishlar vazirligining moddiy-texnik bazasini rivojlantirish, xodimlarini moddiy rag‘batlantirish va boshqa xarajatlar maxsus jamg‘armasiga yo‘naltiriladi.
Avvalroq onlayn auksionda 01 Q 001 QB avtomobil raqami qariyb 5 ming dollarga sotilgani, Xorazmda 90 O 900 OA avtoraqami uchun onlayn auksionda kurash tonggacha davom etgani to‘g‘risida xabar berilgandi.
Izoh (0)