Ҳар бир янги рол актёр учун тўлиқ ўз қаҳрамонига айланиш жараёни эканлигини исботловчи ҳолатлар (фото)

Кўпчилик актёрлар кинодаги қаҳрамонларига айланиш учун ҳаддан ташқари кўп куч сарфлайди, натижада ўз мухлисларини маҳорат билан ижро этилган роллари билан баҳраманд этишади. AdMe нашри образига кириш учун ҳар қандай ишни қиладиган, ўз касбига профессионал тарзда ёндашадиган ана шундай актёрлар ҳақида маълумот беради.

Зои Кравиц «Бетмен» 

Зои Кравиц режиссёр Мэтт Ривз томонидан суратга олинган «Бетмен» фильмидаги Мушук аёл/Селина Кайл ролига жиддий тайёргарлик кўрган. Каскадёрлар бўйича координатор Роб Алонза билан биргаликда актриса ўз қаҳрамонини яхшироқ ҳис қилиш учун мушуклар ва шерлар жанги акс этган видеоларни ўрганган. Ролга тайёргарлик кўраётганда жанг санъати турларини, шунингдек, мушукка ўхшаш рақс ҳаракатларини машқ қилган.

Анжелина Жоли, «Умрбоқийлар»

«Умрбоқийлар» фильмидаги суперқаҳрамон жангчи Тана ролига тайёргарлик кўриш учун Анжелина Жоли балет дарсларига қатнаган ва турли хил қуроллардан фойдаланишни ўрганган, гарчи у суратга олиш пайтида уларни жисмонан ушлаб турмаса ҳам — қуроллар постпродюсерлик жараёнида рақамли равишда кадрларга қўшилган.

Леонардо Ди Каприо, «Омон қолган»

Леонардо Ди Каприо 2016 йилда унга илк «Оскар»ни олиб келган «Омон қолган» фильмидаги роли учун кўп меҳнат қилиши керак эди. Бошқа нарсалар қатори, актёрлар ва суратга олиш гуруҳи, масалан, қаттиқ совуқ, гипотермия таҳдиди, музли сувда отишмаларга бардош бериши лозим бўлган. Шунингдек, Ди Каприо Арикара маҳаллий халқининг тилини ўрганиши керак эди. Ушбу йўқолиб бораётган лаҳжани ўзлаштириш учун у Том Харди билан бир йил давомида маҳаллий маданият бўйича маслаҳатчи Крейг Фалькон билан ишлади.

Арго Робби «Худкушлар гуруҳи» 

Арго Робби 2016 йилда «Худкушлар гуруҳи» фильмида Жокернинг севгилиси бўлган жозибали, аммо бепарво Харли Куинни ўйнаган. Ток-шоулардан бирида актриса бу рол учун сув остида 5 дақиқа нафас олмай туришни ўрганганини айтган. Бунинг учун Робби 4 та фридайвинг сабоқларини олган ҳолда метаболизмини секинлаштира олишни ўзлаштирган. «Бу худди сув остида медитация қилиш каби», — дейди Робби.

Жейк Жилленхол, «Stringer»

Жейк Жилленхол маҳаллий янгиликларга ҳайратланарли видеоларни сотиш орқали катта пул ишлайдиган фрилансер Луи Блумга тўлиқ ўхшашга қарор қилди. «Мен унинг коёт каби кўринишини хоҳлардим. Бунинг учун мен оч кўринишим ва оч бўлишим керак эди», — дейди актёр. У қаттиқ режимли диетага ўтди, ҳар куни машқ қилди, кунига 16 километр югурди ва деярли 14 килограммга озди.

Кейт Уинслет, «Аватар-2»

Жеймс Кемероннинг «Аватар-2» фильмида Кейт Уинслет сувда яшайдиган жонзот ролини ўйнайди. Актрисанинг сўзларига кўра, бунинг учун у фридайвингни ўрганди. Ҳозирда Кейт сув остида узоқ вақтгача нафасини ушлаб туриши мумкин: унинг шахсий рекорди 7 дақиқа-ю 14 сония.

Аня Тэйлор-Жой, «Қироличанинг юриши»

Аня Тэйлор-Жой етимликда ўсган даҳо Бет Ҳармон ролини ўйнашдан олдин шахмат ҳақида «деярли ҳеч нарса билмаган». Ўйин билан танишиш ва Бетнинг ҳар бир шиддатли ўйинининг ўзига хос ҳаракатларни ўрганиш учун актриса машҳур шахмат мураббийи Брюс Пандолфини билан ишлаган.

«Шахмат назариясини тушуниш мен учун муҳим эди», деб эслайди Тэйлор-Жой. «Мен бу ҳаракатлар кетма-кетлигини эслаб қолгунча деярли ақлдан озай деганман. Хуллас, мен ўйинни суратга олишдан 5 дақиқа олдин ҳаракатларни қайта ўрганиб, уни бармоқларим учун рақс ҳаракатлари сифатида қабул қилардим».

Бен Кингсли, «Ганди»

Келиб чиқиши ҳинд бўлган актёр сер Бен Кингсли Ҳиндистон мустақиллиги учун кураш олиб борган миллий қаҳрамон Маҳатма Ганди ролини қўлга киритгач, дарҳол қаҳрамонининг ватанига бориб, у каби ҳаёт кечира бошлади. У Ганди ҳаёти ҳақидаги кинохроника лавҳаларини ўрганиш, у ҳақидаги китобларни ўқиш, парҳез тутиш, вазн йўқотиш, ёга билан шуғулланиш ва Ганди каби кийиниш орқали ўз ролига жиддий тайёргарлик кўрди. Натижада бу рол унга «Оскар», «Олтин глобус» ва «Энг яхши эркак роли» учун Британия академияси киномукофотини олиб келди.

Элайза Сканлен, «Кичик аёллар»

22 ёшли австралиялик актриса Элайза Сканлен «Кичик аёллар» фильмидаги Бет Марч ролини ўйнаш учун кунига 3 соат пианино чалишни машқ қилиши керак бўлган, чунки бу кастингнинг асосий шарти эди. Фильмда Бет пианино чалаётган саҳналарда Сканлен композицияларни ўзи ижро этган.

Антонио Бандерас, «Зорро ниқоби»

Ушбу рол учун Антонио Бандерас ретроюлдуз Эррол Флиннга устозлик қилган Боб Андерсондан қиличбозликни ўрганган. Ўз навбатида, Андерсон Бандерас афсонавий Флинндан кейин ўзи тарбиялаган энг яхши қиличбоз эканлигини тан олган. Актёр ролини шу қадар жиддий қабул қилганки, у ҳатто Испания Олимпия терма жамоаси билан ҳам 4 ой шуғулланган.

Лив Тайлер, «Узуклар ҳукмдори»

«Узуклар ҳукмдори» кинотрилогиясидаги элф Арвен Ундомиэл роли Лив Тайлерга оламшумул шуҳрат келтирди. Актриса ролини қойилмақом ижро этиш учун от минишни, қилич билан жанг қилишни ва элфча гапиришни ўрганди. «Мен фильмда элфлар тилида жуда кўп гапирганман, ҳатто қилич ўйнатиш ёки от минишдан ҳам кўпроқ, шунинг учун диалект бўйича мураббий билан кўп вақт ўтказдим», — дейди Тайлер.

Ал Пачино, «Аёл ифори»

Ушбу ролга тайёргарлик кўришда Ал Пачинога кўзи ожизлар мактаби ёрдам берди. Унинг сўзларига кўра, у кўзларини ҳеч нарсага қаратишига йўл қўймай, ўзини кўр қилиб кўрсатган. Ал Пачино суратга олиш майдончасидан ташқарида ҳам образда бўларди. У таёғи билан юрар, одамлар билан гаплашганда ҳеч кимга қарамас, гўё уларни кўрмаётгандай турарди.

Леди Гага, «Гуччи уйи»

35 ёшли актриса ва қўшиқчи «Гуччи уйи» фильмидаги Патрисия Режани ролига суратга тушишдан 1,5 йил олдин тайёргарлик кўра бошлаганини ва бу даврда ҳатто камера олдида бўлмаганида ҳам 9 ой давомида итальянча аксент билан гапирганини айтган. Образига киришиш учун у фотография билан шуғулланган ва пантераларни овлаш ҳақида кўплаб видеоларни томоша қилган. У Режанини ёввойи мушукларга қиёслаб: «Улар аввал ўзига мафтун қилиб, кейин ташланишади», — дейди.

«Сариқ сочли бўлганим учун аксентсиз билан гапириш деярли мумкин эмас эди. Мен дарҳол сочимни бўядим ва дунёни унинг кўзлари билан кўра бошладим: менга молиявий фойда келтириши мумкин бўлган ҳамма нарсага эътибор бера бошладим», — дейди Гага.