Дунёда пандемия бошланганидан бери биринчи марта 24 соат ичида коронавирус аниқланган одамлар сони уч миллиондан ошди. 12 январь, чоршанба куни кечқурун Жаҳон соғлиқни сақлаш ташкилоти (ЖССТ) сайтида эълон қилинган маълумотлар шундан далолат бермоқда.
ЖССТ маълумотларига кўра, ўтган кун давомида 3 395 785 кишида COVID-19 инфекцияси аниқланган, бу рекорд кўрсаткич. Аввалги антирекорд 6 январда қайд этилганди — 2,6 миллион.
Шу вақтга қадар дунё бўйлаб 312 миллион киши коронавирус билан касалланган, улардан 5 миллион нафари инфекция асоратлари туфайли вафот этган (ўтган суткада 7 735 киши).
Касалланганлар сонининг кўплиги бўйича АҚШ (61,3 миллион), Ҳиндистон (36 миллион) ва Бразилия (22,6 миллион) етакчи давлатлар ҳисобланади. Ўлим даражаси бўйича ҳам АҚШ (833 мингдан ортиқ киши), Бразилия (620 минг) ва Ҳиндистон (484 мингдан ортиқ) олдинда бормоқда.
Қайд этилишича, АҚШда коронавирус билан оғриган болаларни касалхонага ётқизишлар бир ҳафта ичида 80 фоизга ошган. Мамлакатда суткасига 800 га яқин вояга етмаганлар шифохоналарга олиб кетилмоқда.
ЖССТ статистикаси касалланиш ва ўлим ҳолатлари ҳақида фақатгина мамлакатлар томонидан тақдим этилган расмий маълумотларга асосланади.
Изоҳ (0)