Dunyoda pandemiya boshlanganidan beri birinchi marta 24 soat ichida koronavirus aniqlangan odamlar soni uch milliondan oshdi. 12-yanvar, chorshanba kuni kechqurun Jahon sog‘liqni saqlash tashkiloti (JSST) saytida e’lon qilingan ma’lumotlar shundan dalolat bermoqda.
JSST ma’lumotlariga ko‘ra, o‘tgan kun davomida 3 395 785 kishida COVID-19 infeksiyasi aniqlangan, bu rekord ko‘rsatkich. Avvalgi antirekord 6-yanvarda qayd etilgandi — 2,6 million.
Shu vaqtga qadar dunyo bo‘ylab 312 million kishi koronavirus bilan kasallangan, ulardan 5 million nafari infeksiya asoratlari tufayli vafot etgan (o‘tgan sutkada 7 735 kishi).
Kasallanganlar sonining ko‘pligi bo‘yicha AQSh (61,3 million), Hindiston (36 million) va Braziliya (22,6 million) yetakchi davlatlar hisoblanadi. O‘lim darajasi bo‘yicha ham AQSh (833 mingdan ortiq kishi), Braziliya (620 ming) va Hindiston (484 mingdan ortiq) oldinda bormoqda.
Qayd etilishicha, AQShda koronavirus bilan og‘rigan bolalarni kasalxonaga yotqizishlar bir hafta ichida 80 foizga oshgan. Mamlakatda sutkasiga 800 ga yaqin voyaga yetmaganlar shifoxonalarga olib ketilmoqda.
JSST statistikasi kasallanish va o‘lim holatlari haqida faqatgina mamlakatlar tomonidan taqdim etilgan rasmiy ma’lumotlarga asoslanadi.
Izoh (0)