Қозоғистоннинг биринчи президенти Нурсултон Назарбоев ўз ихтиёри билан Хавфсизлик кенгаши раҳбарлигидан кетишга қарор қилган. Бу ҳақда Назарбоевнинг матбуот котиби Айдос Укибайнинг баёнотига асосланиб, «Орда.кз» хабар берди.

Матбуот котибининг сўзларига кўра, Назарбоев «тартибсизлик ва террор мамлакат раҳбариятидан тезкор, қатъий ва муросасиз жавоб талаб қилишини яхши тушунган».

Назарбоев ва Қозоғистоннинг амалдаги президенти Қосим-Жўмарт Тўқаев ҳар доим «баррикадаларнинг битта томонида туриб, ўз халқи, мамлакати ва миллат келажагини ҳимоя қилган», деб таъкидлади матбуот котиби.

Укибай, шунингдек, оммавий ахборот воситалари ва ижтимоий тармоқларда Назарбоев тўғрисида «ёлғон миш-мишлар ва провокацион хабарлар» тарқалаётганидан қайта огоҳлантирди.

Қозоғистонда норозилик намойишлари бошланганидан кейин Нурсултон Назарбоевнинг ўзи бирор марта омма олдига чиқмади, ҳеч қандай турда баёнот ҳам бермади. Унинг матбуот котиби аввалроқ Назарбоевнинг Қозоғистонда эканини ва президент Қосим-Жўмарт Тўқаев билан алоқада бўлиб турганини айтганди.

Нурсултон Назарбоев 2019 йилда Қозоғистон президенти лавозимини тарк этгач, Хавфсизлик кенгашининг раҳбари сифатида фаолият юритаётганди. У умрининг охиригача мазкур лавозим ваколатларига эга эди. Қозоғистонда ёнилғи нархи ошиши сабабли бошланган норозилик намойишлари фонида 5 январь куни Қозоғистоннинг амалдаги президенти Тўқаев Назарбоевнинг ўрнига Хавфсизлик кенгашини бошқаришга киришганди.