Qozog‘istonning birinchi prezidenti Nursulton Nazarboyev o‘z ixtiyori bilan Xavfsizlik kengashi rahbarligidan ketishga qaror qilgan. Bu haqda Nazarboyevning matbuot kotibi Aydos Ukibayning bayonotiga asoslanib, “Orda.kz” xabar berdi.
Matbuot kotibining so‘zlariga ko‘ra, Nazarboyev “tartibsizlik va terror mamlakat rahbariyatidan tezkor, qat’iy va murosasiz javob talab qilishini yaxshi tushungan”.
Nazarboyev va Qozog‘istonning amaldagi prezidenti Qosim-Jo‘mart To‘qayev har doim “barrikadalarning bitta tomonida turib, o‘z xalqi, mamlakati va millat kelajagini himoya qilgan”, deb ta’kidladi matbuot kotibi.
Ukibay, shuningdek, ommaviy axborot vositalari va ijtimoiy tarmoqlarda Nazarboyev to‘g‘risida “yolg‘on mish-mishlar va provokatsion xabarlar” tarqalayotganidan qayta ogohlantirdi.
Qozog‘istonda norozilik namoyishlari boshlanganidan keyin Nursulton Nazarboyevning o‘zi biror marta omma oldiga chiqmadi, hech qanday turda bayonot ham bermadi. Uning matbuot kotibi avvalroq Nazarboyevning Qozog‘istonda ekanini va prezident Qosim-Jo‘mart To‘qayev bilan aloqada bo‘lib turganini aytgandi.
Nursulton Nazarboyev 2019-yilda Qozog‘iston prezidenti lavozimini tark etgach, Xavfsizlik kengashining rahbari sifatida faoliyat yuritayotgandi. U umrining oxirigacha mazkur lavozim vakolatlariga ega edi. Qozog‘istonda yonilg‘i narxi oshishi sababli boshlangan norozilik namoyishlari fonida 5-yanvar kuni Qozog‘istonning amaldagi prezidenti To‘qayev Nazarboyevning o‘rniga Xavfsizlik kengashini boshqarishga kirishgandi.
Mavzuga doir:
- To‘qayev KXShTga Qozog‘istondagi vaziyatni tiklashda ko‘rsatayotgan yordami uchun minnatdorlik bildirdi
- Qozog‘istondagi tartibsizliklar oqibatida yetkazilgan zarar miqdori baholandi
- “Qotillar bilan qanday qilib muzokara olib borish mumkin?” — To‘qayev “terrorchilarga” qarshi ogohlantirmasdan o‘q uzishni buyurdi
Izoh (0)