Фарғона вилояти Фурқат туманида 5 январь куни фуқаронинг уйига ғайриқонуний равишда бостириб кириб, босқинчилик қилган шахслар қўлга олинди. Бу ҳақда вилоят Ички ишлар бошқармаси хабар қилди.
Маълум қилинишича, шу куни соат 21:30 атрофида Р.С. С.С. ва И.Б. исмли уч нафар шахс олдиндан жиноий тил бириктириб, ўзганинг мол-мулкини босқинчилик йўли билан қўлга киритиш мақсадида, ниқобланган ҳолда, пичоқ ва скотч билан қуролланиб, «Истиқлол» маҳалласида яшовчи Х.М. исмли аёлнинг яшаш хонадонига бостириб кирган. Улар аёл ва унинг вояга етмаган қизига ошхона пичоғи билан ҳужум қилиб, танасининг турли жойларига уриб, ҳаёт ва соғлиқ учун хавфли зўрлик ишлатиб, қўл, оёқ ва оғиз соҳаларини скотч билан боғлаган.
Босқинчилар уйдаги нархи 3 миллион сўмлик тилла-тақинчоқларни талон-торож қилиб, воқеа жойидан яширинаётган вақтда туман ИИБ ходимлари томонидан далилий ашёлар билан қўлга олинган.
Ҳолат юзасидан уч нафар шахсга нисбатан Жиноят кодексининг 164-моддаси 3-қисми «в» банди (уй-жойга, омборхона ёки бошқа биноларга ғайриқонуний равишда кирган ҳолда босқинчилик қилиш) билан жиноят иши қўзғатилиб, процессуал тартибда ушланган.
Мазкур жиноят учун ўн йилдан ўн беш йилгача озодликдан маҳрум қилиш жазоси тайинланади.
Мавзуга доир:
- Қашқадарёда пистолет ва электрошокер билан фуқаронинг пул ва буюмларини тортиб олган шахслар ушланди
- Тошкентда ўзи ишлаган хонадонга кириб, 15 минг долларни ўғирлаб кетган уста ва унинг 6 шериги ушланди (видео)
- Тошкентда «киноларда кўрганидек» дўконга ўғриликка тушиб, 1,4 млн сўм ва тамаки ўғирлаган шахслар ушланди
Изоҳ (0)