Ўзбекистонда жазони ўтаб бўлган фуқароларга бизнес очиши учун моддий ёрдам бериш йўлга қўйилади

Ўзбекистонда жазони ўтаб бўлган фуқароларга давлат томонидан бир марталик «ёрдам пакети»ни бериш тизими жорий этилади. Бу ҳақда «Янги Ўзбекистоннинг 2022–2026 йилларга мўлжалланган тараққиёт стратегияси тўғрисида»ги президент фармони лойиҳасида сўз боради.

Ҳужжат лойиҳасига кўра, жазони ўтаб бўлган фуқароларнинг келгусида жамиятда ўз ўрнини топишига амалий кўмаклашиш учун «дастлабки ижтимоий-моддий ёрдам пакети»ни бериш тизими жорий қилинади.

Ушбу тизим доирасида жазони ўтаб бўлган ва ўзининг аниқ лойиҳасини (тадбиркорлик, ишлаб чиқариш, меъморчилик ва ҳоказо) тақдим этиб, мустақил фаолиятини бошламоқчи бўлган фуқароларга бир марталик моддий ёрдам бериш амалиёти йўлга қўйилади.

Шунингдек, маҳкумлар ва жазони ўтаб бўлган шахсларнинг меҳнат, ижтимоий таъминот ва халқаро эътироф этилган бошқа ҳуқуқларини таъминлаш, уларнинг ижтимоий мослашуви ва жамиятга реинтеграциясига кўмаклашишнинг самарали механизмларини жорий этиш, ушбу йўналишда давлат ва жамият институтларининг биргаликдаги фаолиятини йўлга қўйиш мақсадида

• озодликдан маҳрум этилган шахсларга жазони ўташ шароитлари халқаро стандартларга мувофиқ такомиллаштирилади;
• меҳнатга жалб этилган маҳкумларга колониялардаги иш стажини умумий меҳнат стажига қўшиб ҳисоблаш тартиби жорий этади;
• маҳкумларнинг тузалиш йўлига ўтганлигини белгиловчи қатъий мезонлар белгиланади

Эслатиб ўтамиз, 2020 йилнинг январида Тошкент шаҳар ИИББ «Панелний» қамоқхонасидаги шароитлар халқаро стандартларга жавоб беришини маълум қилганди. АҚШнинг Халқаро диний эркинлик масалалари бўйича комиссияси 2021 йилнинг октябрида Ўзбекистондаги диний ва сиёсий маҳбуслар ҳақида ҳисоботини эълон қилганди. Ҳисоботда таъкидланишича, мамлакатда президент ўзгарган 2016 йил охиридан бери минглаб маҳбуслар озод этилганига қарамай, 2000 дан зиёд одам конституциявий тузумга тажовуз қилиш, тақиқланган адабиётларни сақлаш ёки тақиқланган гуруҳларга аъзо бўлиш каби «мужмал ва ҳаддан ташқари кенг талқин қилиш мумкин бўлган айбловлар» билан қамоқда қолмоқда.