Ўзбекистонда аёлларга пенсия ҳисоблашда уларнинг болани парваришлаш таътилида бўлиш вақти 3 йилдан 6 йилга оширилиши мумкин

Адлия вазирлиги «Янги Ўзбекистоннинг 2022–2026 йилларга мўлжалланган тараққиёт стратегияси тўғрисида»ги президент фармони лойиҳасини муҳокамага қўйди.

Фармон билан Тараққиёт стратегиясида камбағалликни қисқартириш бўйича белгиланган вазифалар доирасида 2023 йил 1 январдан бошлаб пенсияни ҳисоб-китоб қилиш учун иш ҳақининг максимал миқдори пенсияни ҳисоблаш базавий миқдорини ўн баробаридан ўн икки баробаригача ошириш кўзда тутилган.

Молия вазирлигига уч ой муддатда пенсияни ҳисоблаш базавий миқдорини қайта кўриб чиқиш билан биргаликда Ўзбекистоннинг «Фуқароларнинг давлат пенсия таъминоти тўғрисида»ги қонунига қуйидаги ўзгартиришларни киритилишини назарда тутувчи қонун лойиҳасини киритиш топширилмоқда:

• аёлларга пенсия ҳисоблашда уларнинг болани парваришлаш таътилида бўлиш вақтининг ҳаммасини жамлаганда иш стажига қўшиб ҳисобланадиган 3 йиллик даврни 6 йилга ошириш;
• ногиронлиги болаликдан бўлган болаларга 18 ёшгача қаралган даврни пенсия тайинлашда иш стажига қўшиб ҳисоблаш;
• Шунингдек, ҳужжат билан 2026 йилга қадар эҳтиёжманд аҳоли ижтимоий нафақа ва моддий ёрдам билан тўлиқ қамраб олиниши кўзда тутилган.

Молия вазирлиги Иқтисодий тараққиёт ва камбағалликни қисқартириш вазирлиги, Маҳалла ва оилани қўллаб-қувватлаш вазирлиги ҳамда Бандлик ва меҳнат муносабатлари вазирлиги билан биргаликда уч ой муддатда қуйидагиларни назарда тутувчи аҳолини ижтимоий ҳимоя қилиш миллий стратегияси лойиҳасини Вазирлар Маҳкамасига киритиши лозим:

• ижтимоий ҳимоя соҳасида ягона давлат сиёсатини олиб бориш бўйича масъул давлат органини белгилаш;
• ижтимоий суғурта тизимини яратиш, жумладан ижтимоий суғурта жамғармасини ташкил этиш;
• кам таъминланган оилаларга ижтимоий ёрдам ва хизматларни ижтимоий шартнома асосида тақдим этиш;
• «Ижтимоий ҳимоя ягона реестри» ахборот тизимида ёрдамга муҳтож аёллар, ёшлар ва ногиронлиги бўлган шахслар бўйича алоҳида маълумотлар базасини яратиш, жумладан «Темир дафтар», «Ёшлар дафтари» ва «Аёллар дафтари»ни «Ижтимоий ҳимоя ягона реестр»и билан интеграция қилиш.

Эслатиб ўтамиз, 2021 йилнинг декабрь ўрталарида «Фуқароларнинг давлат пенсия таъминоти тўғрисида»ги қонун ҳамда Меҳнат кодексига ўзгартиш ва қўшимчалар киритилаётгани тўғрисида хабар берилганди. Янги қонун лойиҳасига кўра, боқувчисини йўқотганлик пенсияси тўловларини марҳумнинг қарамоғидаги фарзандларига, улар 18 ёшгача, агар умумий ўрта таълим муассасаси, академик лицей ва олий таълим муассасасида ўқиётган бўлса 23 ёшга тўлгунга қадар боқувчисини йўқотганлик пенсиясини тўлаш кўзда тутилган.