Тошкент шаҳрининг жамоат транспорти тизими такомиллаштирилиб, инфратузилмаси ривожлантирилади. Бу ҳақда жамоатчилик муҳокамасига қўйилган Ўзбекистоннинг 2022—2025 йилларга мўлжалланган тараққиёт стратегиясида айтиб ўтилган.
Маълум қилинишича, ерусти йўловчи ташиш транспорти йўналишлари тармоғи метрополитен билан интеграциялашади. Бу орқали жами 84 та, жумладан, 2022 йилда 14 та янги ҳаракат таркиби (метро поездлари) харид қилинади.
Қайд этилишича, Тошкент шаҳрида ўзаро узвий боғланган барча транспорт турларини ривожлантириш дастури ишлаб чиқилади. Бу орқали 673 дона электробус харид қилинади. 11 та магистрал, 14 та ҳалқа, 92 та боғловчи ва 42 та етказиб берувчи янги мунтазам автобус йўналиши тармоғи яратилади.
Имконияти чекланган шахслар учун қулай шароитга эга бўлган 1160 та оралиқ бекати қайтадан қурилади. Ҳар йили 50 километрдан, 5 йил давомида жами 250 километр велосипед ва пиёдалар йўлаклари қурилади.
Шунингдек:
- 52 та автостанция қуриш ҳамда 29 тасини реконструкция қилиш;
- 278 та янги автобус йўналиши очиш;
- 60 та янги шаҳарлараро автобус йўналишини ташкил этиш режалаштирилган.
Изоҳ (0)