«Дизайн» жамоасидан тадбиркор фойдасига 30 минг доллар ундирилган — МИБ

Ижтимоий тармоқда «Дизайн» жамоаси аъзолари бир тадбиркордан концерт учун тахминан 30 минг доллар олиб, қайтариб бермаётгани ҳақида хабарлар тарқалганди. Хабарда карантин вақтида жамоа тадбиркор билан «Alladin.tv» платформасида концертни онлайн тарзда ўтказишга келишиб, жамоанинг саҳнага чиқувчи асосий тўрт нафар аъзоси тадбиркордан 30 минг АҚШ доллари олгани қайд этилган.

АОКАда ўтказилган матбуот анжуманида Мажбурий ижро бюроси матбуот хизмати раҳбари Фаррух Тошпўлатов мазкур ҳолатга тўхталиб ўтиб, тадбиркорнинг пуллари ундирилганини маълум қилди.

Таъкидланишича, ҳақиқатан ҳам фуқаролик ишлари бўйича Учтепа туманлараро судининг ҳужжатига асосан «Дизайн» жамоасининг Мусабеков, Каримбердиев, Мавлонов ва Фатҳуллаевдан даъвогар Саломовнинг фойдасига солидар тартибда 336 миллион 132 минг сўм маблағни ундириш бўйича қарори МИБнинг Чилонзор ва Юнусобод туман бўлимларига келиб тушган.

Олиб борилган ижро ҳаракатлар давомида ушбу фуқароларнинг номига расмийлаштирилган мол-мулк ва автотранспорт воситаларига уларнинг ҳаракатларини чеклаш бўйича тақиқлар ўрнатилган.

«Шу пайтгача қарздорларнинг Lacetti ва Cobalt автомобиллари жарима майдончасига қўйилган. Шундан кейин қарздорлар барча қарзларини тўлаб берди. Булар 336 миллион 132 минг сўмлик ижро йиғими ва 1 миллион 134 минг сўмлик, жами 343 миллион 989 минг сўмлик маблағларни тўлаб берди. Яъни ҳозир бутун қарздорлик тўлаб берилди», — дейди Фаррух Тошпўлатов.

Эслатиб ўтамиз, 2018 йилда «Ўзбекконцерт» давлат муассасаси «Дизайн» жамоасига берилган лицензияни бекор қилганди. Бунга жамоа аъзолари Тошкент вилоятида жойлашган Imzo Garden дам олиш масканига таклиф этилган «Дизайн» жамоаси аъзолари одоб-ахлоқ қоидаларига тўғри келмайдиган, беўхшов ҳазилларни ижро этгани сабаб бўлган эди.

Шундан сўнг жамоа аъзолари Дилшод Мусабеков ва Саъдулла Фатҳуллаев видеомурожаат билан чиқиб, ўзбек халқи, хусусан, ички ишлар ходимларидан номаъқул сўзлар ишлатилган латифалар учун кечирим сўраган ва бундай ҳолат бошқа такрорланмаслигига ваъда берганди.