Ijtimoiy tarmoqda “Dizayn” jamoasi a’zolari bir tadbirkordan konsert uchun taxminan 30 ming dollar olib, qaytarib bermayotgani haqida xabarlar tarqalgandi. Xabarda karantin vaqtida jamoa tadbirkor bilan “Alladin.tv” platformasida konsertni onlayn tarzda o‘tkazishga kelishib, jamoaning sahnaga chiquvchi asosiy to‘rt nafar a’zosi tadbirkordan 30 ming AQSh dollari olgani qayd etilgan.
AOKAda o‘tkazilgan matbuot anjumanida Majburiy ijro byurosi matbuot xizmati rahbari Farrux Toshpo‘latov mazkur holatga to‘xtalib o‘tib, tadbirkorning pullari undirilganini ma’lum qildi.
Ta’kidlanishicha, haqiqatan ham fuqarolik ishlari bo‘yicha Uchtepa tumanlararo sudining hujjatiga asosan “Dizayn” jamoasining Musabekov, Karimberdiyev, Mavlonov va Fathullayevdan da’vogar Salomovning foydasiga solidar tartibda 336 million 132 ming so‘m mablag‘ni undirish bo‘yicha qarori MIBning Chilonzor va Yunusobod tuman bo‘limlariga kelib tushgan.
Olib borilgan ijro harakatlar davomida ushbu fuqarolarning nomiga rasmiylashtirilgan mol-mulk va avtotransport vositalariga ularning harakatlarini cheklash bo‘yicha taqiqlar o‘rnatilgan.
“Shu paytgacha qarzdorlarning Lacetti va Cobalt avtomobillari jarima maydonchasiga qo‘yilgan. Shundan keyin qarzdorlar barcha qarzlarini to‘lab berdi. Bular 336 million 132 ming so‘mlik ijro yig‘imi va 1 million 134 ming so‘mlik, jami 343 million 989 ming so‘mlik mablag‘larni to‘lab berdi. Ya’ni hozir butun qarzdorlik to‘lab berildi”, — deydi Farrux Toshpo‘latov.
Eslatib o‘tamiz, 2018-yilda “O‘zbekkonsert” davlat muassasasi “Dizayn” jamoasiga berilgan litsenziyani bekor qilgandi. Bunga jamoa a’zolari Toshkent viloyatida joylashgan Imzo Garden dam olish maskaniga taklif etilgan “Dizayn” jamoasi a’zolari odob-axloq qoidalariga to‘g‘ri kelmaydigan, beo‘xshov hazillarni ijro etgani sabab bo‘lgan edi.
Shundan so‘ng jamoa a’zolari Dilshod Musabekov va Sa’dulla Fathullayev videomurojaat bilan chiqib, o‘zbek xalqi, xususan, ichki ishlar xodimlaridan noma’qul so‘zlar ishlatilgan latifalar uchun kechirim so‘ragan va bunday holat boshqa takrorlanmasligiga va’da bergandi.
Izoh (0)