Фарғоналик илғор ўқитувчилар хорижда малака оширади, улар учун вилоят ҳокимлигининг махсус устамаси жорий этилади. Ўқувчилар давомати Face control (юздан таниб олиш) қурилмалари орқали назорат қилинади. Бу ҳақда вилоят ҳокими Хайрулло Бозоровнинг 2021 йилги ижтимоий-иқтисодий ривожланиш якунлари ҳамда 2022 йил учун белгиланган вазифалар юзасидан аҳолига мурожаатида айтиб ўтилди, дея хабар берди «Дарё» мухбири Азизжон Эрматов.
Қайд этилишича, 2022 йилда 147 миллиард сўм маблағ эвазига вилоятдаги 25 та мактабда реконструкция ва мукаммал таъмирлаш ишлари амалга оширилади.
Мактабларда ўқувчилар давоматини яхшилаш бўйича янги давоматни назорат қилиш ахборот тизими жорий этилади. Ўтган йили ўрганишларимиз натижасида Қўқон шаҳридаги мактабларда давомат жуда пастлиги аниқланган эди. Шундан кейин Face ID — ўқувчилар давоматини юздан аниқлаш тизимини тажриба сифатида жорий қилгандик. Ушбу тизим яхши самара бериб, ўқувчилар давомати 15 фоизга ўсди. Аста-секин бутун вилоят бўйича шу тизимга ўтилади.Эслатиб ўтамиз, Хайрулло Бозоров аҳолига мурожаатида ортиқча вазндан халос бўлган амалдорлар ва фуқароларга бир килограмм учун 500 минг сўмдан пул тўланишини маълум қилганди.Вилоятда таълим сифатини яхшилаш, хусусий мактаблар сонини кўпайтириш учун махсус имтиёзли кредит дастури ишлаб чиқилади, кредитнинг бир қисми учун вилоят ҳокимлигининг кафиллиги берилади. Энг яхши натижа қайд этган хусусий мактаблар учун вилоят маҳаллий бюджетидан субсидиялар ажратиш тизими йўлга қўйилади.Энг яхши ўқитувчиларимиз вилоят ҳокимлиги томонидан хорижий давлатларга тажриба ўрганиш ва малака ошириш учун юборилади.
2022—2023-ўқув йили якуни бўйича мактаб дастурига киритилган ҳар бир фан бўйича энг яхши кўрсаткичларга эришган ўқитувчилар учун мавжуд устамаларга қўшимча равишда вилоят ҳокимлигининг махсус устамаси жорий этилади. Бу устама бир ўқув йили давомида тўлаб борилади, унинг талаблари ҳамда низоми ишлаб чиқилиб, барча педагогларга етказилади.
Хайрулло Бозоров, Фарғона вилоят ҳокими
Мавзуга доир:
- «Завод, фабрика қуриб, сўз санъатидан узоқроқ бўлибман. Ҳоким бўлиш хаёлимга ҳам келмаган эди» – Жаҳонгир Ортиқхўжаев
- «Эрталаб ва кечқурун пиёда юришни ташкил қилган маҳалла раислари ва ташкилот раҳбарларини Дубайга юбораман». Шуҳрат Абдураҳмонов қанча пул кетса ҳам одамларни юргазишини маълум қилди
- «Қашқадарёлик фаол журналист ва блогерлар хорижда малака оширади» — Муроджон Азимов
Изоҳ (0)