Дунё ва ўзбек спортига оид 21 декабрнинг энг муҳим хабарлари дайжести билан танишинг.
Ўзбекистон
Ўзбекистон U-15 терма жамоаси БААдан устун келдиСервер Жепаров қўл остидаги Ўзбекистон U-15 терма жамоаси 21 декабрь куни БААга қарши ўртоқлик ўйинида иштирок этди. Дубайда бўлиб ўтган баҳсда ўзбекистонлик футболчилар минимал ҳисобдаги ғалабани қўлга киритди.
Ўртоқлик ўйини
БАА U-15 — Ўзбекистон U-15 0:1
Гол: 0:1 – 42 Лазизбек Мирзаев.
«Шерлар» 2021 йилги мавсумни кўтаринки руҳда ўтказган футболчи билан келишувни яна 2 йилга узайтирди. Шу тариқа Холматов 2023 йил декабрига қадар «Пахтакор»да қолади. Бу ҳақда клуб матбуот хизмати маълум қилди.
Диёр «Пахтакор» сафида 2020 йил дебют қилган. Шу вақтга қадар у Тошкент клуби сафида 31 ўйин ўтказиб, иккита гол уришга улгурди.
Жаҳон
«Ювентус» Криштиану Роналдуга уч йил давомида 277 млн евро сарфлаган
La Gazzetta dello Sport маълумотларига кўра, туринликлар Роналду билан ҳамкорликнинг уч йили давомида 277 миллион евро сарфлаган. Бу миқдорга футболчининг трансфери, маоши ва бошқа харажатларига кетган пул киради.
Эслатиб ўтамиз, Роналду Турин клуби сафида 2018—2021 йиллар оралиғида тўп тепди.
Шунингдек, «Ювентус» 2016—2020 йиллар давомида клубда тўп сурган Гонсало Игуаин учун 122 миллион евро сарф қилган.
Неймар яна 4–5 ҳафта майдонга туша олмайди
«ПСЖ» жамоа ҳужумчиси Неймарнинг тикланиш жараёни ҳақида маълумот берди. Қайд этилишича, бразилиялик футболчининг майдонга қайтишигача яна 4–5 ҳафта вақт бор.
Эслатиб ўтамиз, Неймар ноябрь ойи охирида чап оёқ болдир ошиғидан жароҳат олганди. Ўшанда футболчи январь ойи ўрталарига қадар сафдан чиққани айтилганди.
Неймар Лига 1 жорий мавсумида 10 та ўйин ўтказиб, учта гол уришга эришди.
«Ливерпуль» Эрлинг Ҳоланд учун курашга қўшилди
Мерсисайдлар ёзги трансфер ойнасида марказий ҳужумчи сотиб олмоқчи. Ҳоланд номзодлардан бири бўлиб турибди, дея хабар қилмоқда Sky Sport Deutschland.
Ушбу трансфер Муҳаммад Салоҳни жамоада олиб қолишга ёрдам бериши мумкин. Мисрлик футболчи янги шартнома тузишдан аввал «Ливерпуль» таркибни сезиларли даражада кучайтиришига ишонч ҳосил қилмоқчи.
Норвегиялик футболчи жорий мавсум «Боруссия Д» сафида 16 ўйин ўтказиб, 19 та гол ва тўртта голли узатмага муаллиф бўлди.
«Манчестер Юнайтед» Каванини ёзгача олиб қолмоқчи, «Барселона» эса уни январда қўлга киритиш истагида
Манкунианлар коронавирус билан боғлиқ вазият сабаб таркибдаги кенг танловни сақлаб қолмоқчи. Шу сабаб «Юнайтед» Эдинсон Каванини қишки трансфер ойнасида қўйиб юбормоқчи эмас, дея хабар бермоқда Daily Mail.
«Барселона»га эса ҳозирда ҳужумчи жуда зарур. Аввалроқ каталонлар уругвайлик футболчи билан шахсий шартнома борасида келишувга эришгани хабар қилинганди.
Ислом Махачевнинг UFC’даги навбатдаги жанги санаси ва рақиби расман тасдиқланди
Енгил вазн тоифаси вакили бўлган Махачев (21-1) навбатдаги жангини 27 февраль куни Бенеил Дариушга (21-4-1) қарши ўтказади. Буни промоушен матбуот хизмати тасдиқлади. Мазкур беллашув Fight Night туркумидаги мусобақанинг асосий жанги бўлади.
Ушбу мусобақада ўзбекистонлик яккакурашчи Маҳмуд Муродов ҳам ўз жангини ўтказади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!