Қашқадарё вилоятида 2021 йил давомида «аёллар дафтари», «ёшлар дафтари» ва «темир дафтар»га киритилган фуқароларга 83 миллиард сўмлик ёрдам берилгани маълум бўлди. Бу ҳақда вилоят ҳокими Муроджон Азимовнинг 2021 йилги ижтимоий-иқтисодий ривожланиш якунлари ҳамда 2022 йил учун белгиланган вазифалар юзасидан аҳолига мурожаатномасида айтиб ўтилди, дея хабар берди «Дарё» мухбири.

Қайд этилишича, вилоятда «темир дафтар»да турган 13 мингга яқин кам таъминланган оилаларни ижтимоий қўллаб-қувватлаш учун «Саховат ва кўмак» жамғармаси ҳисобидан 22 миллиард сўм маблағ йўналтирилган. Шунингдек, ушбу дафтардаги 11 минг 686 та оиланинг 25 минг 176 нафар 18 ёшга тўлмаган фарзандига 12 миллиард 588 миллион сўмлик бир марталик ёрдам кўрсатилган.

« ‘Аёллар дафтари’ билан ишлаш тизими доирасида 71 мингдан зиёд хотин-қизларга 25 миллиард сўмлик манзилли ёрдам кўрсатилди. Жумладан, 26 мингга яқин хотин-қизлар бандлиги таъминланди, 5,9 мингдан зиёди тадбиркорлик бўйича ўқитилди ҳамда 4,5 минг нафари 63 миллиард сўмлик имтиёзли кредитлар ажратилди.

840 нафар I гуруҳ ногиронлиги бўлган хотин-қизларнинг уй-жойлари таъмирлаб берилди, нотурар жойларда ва ижарада яшаб келаётган 257 нафар аёл уй-жой билан таъминланиб, уй-жойга муҳтож 106 нафар хотин-қизларга бошланғич тўлов тўлаб берилди. 10 500 нафар тиббий ҳимояга муҳтож хотин-қиз стационар ва амбулатор шароитда даволанди», — деди вилоят раҳбари ўз мурожаатномасида.

Қўшимча қилинишича, вилоятда «ёшлар дафтари»га киритилган 50 минг 329 нафар йигит-қизларнинг 47 минг 517 нафари (94,4 фоизи) дафтардан чиқарилган. Дафтардаги фуқароларнинг 18 992 нафарига 23 миллиард 460 миллион сўмлик молиявий кўмак берилиб, ижтимоий қўллаб-қувватланган.

Ҳоким Муроджон Азимов аҳолига мурожаатномасида Қарши шаҳридаги «Шодлик» маҳалласида жойлашган 2-сонли ётоқхона ҳақида гапириб, ҳолат уни ташвишга солганини билдирди. Айни пайтда ушбу ётоқхонада таъмирлаш ишлари олиб борилмоқда.