Наманган шаҳрида сутка мобайнида узлуксиз ишлайдиган савдо ва хизмат кўрсатиш кўчалари пайдо бўлади. Бу ҳақда шаҳар ҳокими Ғофиржон Жамалов халқ депутатлари Наманган шаҳар кенгашининг 36-сессиясидаги мурожаатномасида маълум қилди, дея хабар беради «Дарё» мухбири Азизбек Абдувалиев.
Ғофиржон Жамаловга кўра, 2022 йилда Наманган шаҳрида хизматлар соҳасида жами 700 миллиард сўмлик 320 та лойиҳа амалга оширилади. Бунинг ҳисобига 1,5 минг янги иш ўрни яратилади.
«Шаҳардаги бешта — Навоий, Бобур, Уйчи, Амир Темур ва Ҳамроҳ кўчалари ўзига хос хизмат кўрсатиш марказларига айлантирилади. Ушбу кўчалардаги кўп қаватли турар жойларнинг ертўла ва биринчи-иккинчи қаватларида 450 миллиард сўм эвазига савдо ва хизмат кўрсатиш объектлари ташкил этилади. Марғилон, Шаршара ва Носир Убайдуллаев кўчалари эса 24 соат узлуксиз ишлайдиган савдо ва хизмат ҳудуди бўлади», — деди шаҳар ҳокими.
Мурожаатномада таъкидланишича, шаҳарнинг ижтимоий-иқтисодий ривожланишдан ортда қолаётган тўртта маҳалласида маҳаллий тадбиркорлар томонидан умумий қиймати 17 миллиард сўмдан ортиқ бўлган 9 та лойиҳа амалга оширилади ва 700 га яқин иш ўрни яратилади.
Шаҳардаги яна тўртта маҳалла эса ихтисослашувидан келиб чиқиб, косибчилик, ёғочни қайта ишлаш, кўчатчилик ва ҳунармандчилик ҳудудларига айлантирилади ҳамда уларнинг аҳолисига 1,6 миллиард сўм имтиёзли кредит ажратилади.
Изоҳ (0)