Жанубий Корея президенти қароргоҳида Шавкат Мирзиёев ва унинг рафиқасини расмий кутиб олиш маросими бўлиб ўтгани ҳақида хабар берилган эди. Маросимдан сўнг давлат раҳбарлари икки мамлакат расмий делегациялари иштирокида музокара ўтказди.
Президент матбуот хизматининг хабар беришича, Жанубий Корея президенти Мун Чже Ин Сеул Тошкент билан ҳамкорликни барча йўналишларда янада ривожлантиришга катта аҳамият қаратаётганини таъкидлади ва бир қатор йўналишларда ҳамкорликни ривожлантиришга тайёрлигини билдирди.
«Биз Ўзбекистон билан елкама-елка туриб, глобал иқлим ўзгаришларига қарши туришга, ‘ақлли’ шаҳарлар, фермалар, АКТ ва электрик автомобиллар ишлаб чиқариш каби истиқболли йўналишларда ҳамкорликни ривожлантиришга тайёрмиз. Келаётган йилда биз дипломатик муносабатлар ўрнатилганининг 30 йиллигини нишонлаймиз. Умид қиламанки, янги йилда биз биргаликда фаровонликнинг янги саҳифасини очамиз», — деган Мун Чже Ин.
Шавкат Мирзиёев Ўзбекистон ва Жанубий Корея 15 йилдан буён стратегик шерик эканлигини қайд этиб, очиқлик ва ўзаро ишонч икки мамлакат ўртасидаги муносабатлар ривожи учун мустаҳкам пойдевор бўлиб келаётганини таъкидлаган.
Хабарда айтилишича, давлат раҳбарлари тўртинчи бор учрашмоқда. 2017 йил октябрида Шавкат Мирзиёев Жанубий Кореяда давлат ташрифи билан бўлди. 2019 йил апрель ойида президент Мун Чже Иннинг Ўзбекистонга жавоб ташрифи бўлиб ўтди, унинг доирасида Алоҳида стратегик шериклик тўғрисида қўшма декларация қабул қилинди. 2021 йил январидаги онлайн саммитда эса етакчилар ўзаро алоқаларни янада фаоллаштириш бўйича қатор янги ва долзарб ташаббусларни илгари сурди. Кореяга бу галги ташриф фаол мулоқотнинг мантиқий давоми бўлди.
Ўзбекистон президенти яқин даврга мўлжалланган ҳамкорликда учта асосий йўналиш: «яшил» тараққиёт, рақамлаштириш ва ижтимоий ҳимоя тизимини мустаҳкамлаш масалалари кун тартибида турганини таъкидлади. Истиқболдаги барча қўшма лойиҳалар, дастур ва ҳаракатлар режаларини шу асосий устуворликлардан келиб чиққан ҳолда ишлаб чиқиш таклиф этилди.
Шавкат Мирзиёев Ўзбекистоннинг инсон капитали ва табиий ресурслари Жанубий Кореянинг истиқболли технологиялари ва билимлари билан бирлашса, жаҳон бозорида талаб юқори бўлган маҳсулот ишлаб чиқаришни ривожлантириш учун яхши замин яратиш мумкинлигини алоҳида қайд этди.
Шу муносабат билан, давлат раҳбари Иқтисодий тараққиётга кўмаклашиш фондини (EDPF) жалб қилган ҳолда Тошкент вилоятида яримўтказгич ва электроника ишлаб чиқариш бўйича Ўзбекистон—Корея кластерини ташкил этиш таклифини билдирди. Унинг ҳудудида фан-таълим муассасалари, илғор технологиялар соҳасидаги тадқиқот ва ишланмалар марказларини жойлаштириш мумкин бўлади.
Хабарда айтилишича, Ўзбекистон Кореянинг рақамли иқтисодиёт, сунъий интеллект, «ақлли» шаҳарлар, аутсорсинг, алоқанинг янги авлоди ва интернет-технологиялар борасидаги ютуқларидан ўз амалиётида фойдаланишдан манфаатдор.
Ўзбекистон президенти университетлар ўртасидаги инновацион ҳамкорликни ривожлантириш муҳим эканини таъкидлаб, уларнинг мунтазам мулоқоти учун доимий майдон яратиш, келгуси йилда икки мамлакат олий таълим муассасалари ректорлари форумини ўтказишни таклиф қилди.
Музокаралар чоғида пандемиядан кейинги даврда туризм соҳаси иқтисодий ўсиш локомотивларидан бўлиши мумкинлиги таъкидланди. Ўзбекистон Корея компанияларининг меҳмонхоналар ва инфратузилма объектлари қурилиши билан боғлиқ лойиҳалардаги иштирокини қўллаб-қувватлашга тайёр.
2022 йилда мамлакатлар дипломатик муносабатлар ўрнатилганининг 30 йиллиги ва корейс диаспораси Ўзбекистонда истиқомат қилишининг 85 йиллигини нишонлайди. Давлат раҳбари 2022 йилни «Ўзбекистон ва Корея Республикаси ўртасидаги ўзаро алмашинувлар йили» деб эълон қилишни, Тошкентда Корейслар тарихи музейи ҳамда Корейс маданият ва санъат уйи қошида кутубхона ташкил этишни таклиф этди.
Шунингдек, глобал ва минтақавий аҳамиятга молик масалалар юзасидан фикр алмашилди.
Изоҳ (0)