Қошларнинг мукаммал кўринишига ёрдам берадиган 7 тавсия

Образнинг ўзига хос бўлишида қошларнинг кўриниши муҳим рол ўйнайди. Виктория Бекхем ва Аманда Холденга бу борада ёрдам берадиган мутахассис Нилам Холмс қошлар мукаммал кўриниши учун нималарга риоя қилиш кераклиги ҳақида маълумот бериб ўтади.

Қошларни тарашни унутманг

Дастлаб махсус ёки қош толаларини тараш мумкин бўлган чўтка танланг. Бундай чўтка билан қошларни тартибга келтириш толаларнинг қўшимча ўсишини рағбатлантиради. Макияждан олдин қошларни тараш эса қандай урғу бериш кераклигини аниқлаб олишга ёрдам беради. Аммо чўткадан фойдаланиш давомида гигиена қоидаларига амал қилиш учун доимий равишда ювиб туриш кераклигини унутманг.

Намлантирувчи кремлардан фойдаланманг

Аксарият аёл-қизлар намлантирувчи кремларни юзининг бутун қисмига суртишни афзал билади. Аммо мутахассис Нилам Холмснинг таъкидлашича, намлантирувчи воситалар, SPF ва тональ кремлар қош толаларини шикастлаб, уларнинг ўсишига таъсир қилиши мумкин.

Бўяшдан чўчиманг

Ҳар куни макияжга вақт сарфлашни истамайдиганлар учун қошларни бўятиш тавсия қилинади. 20-30 дақиқа давом этадиган мазкур муолажа тўғри амалга оширилса ва мутахассис малакали бўлса, 3 ҳафта давомида қошлар қалин ва тўқ кўринади. Қош шаклини ўзгартиришни истаганларга буни бўяшдан кейин амалга ошириш тавсия қилинади. Бу қандай шакл беришни аниқлаштириб олишга ёрдам беради.

Қош учун мўлжалланган косметик воситаларнинг бир нечтасидан фойдаланинг

Қош учун биргина воситадан фойдаланиш нотабиий кўринишга сабабчи бўлади. Қош учун мўлжалланган турли воситаларни умумлаштириш эса максимал даражада самара беради. Масалан, гел ва қош қаламини бирга ишлатиб, худди гўзаллик салонларидагидек кўринишга келтиришингиз мумкин. Мутахассис эса қалам, пудра ва фиксатордан фойдаланишни тавсия қилади.

Қош қаламининг шаклига эътибор беринг

Қош қаламлари турли шакл ва ўлчамда бўлиши мумкин. Унинг учи қандай шаклда экани эса образнинг қандай чиқишида муҳим рол ўйнайди. Учи ингичка қаламлар қош толаларининг орасини табиий тўлдиради. Учбурчак шаклдагиси эса қошга шакл беришга ёрдам беради.

Хайлайтердан фойдаланинг

Хайлайтердан фойдаланиш ҳам қошларнинг ўзига хос кўринишига ҳисса қўшади. Бунинг учун қошнинг остки қисмига ошириб юбормаган миқдорда хайлайтер суртиш керак бўлади. Шу билан бирга, ушбу косметик восита ранги териникидан бироз оч бўлишига эътибор қаратиш керак. Агар терига мос тушадиган хайлайтер топа олмасангиз, қовоқларга суртиш учун мўлжалланган тендан фойдаланишингиз мумкин.

Овқатланишга эътибор беринг

Ташқи кўринишнинг қандай бўлиши ички аҳвол билан ҳам боғлиқ эканини унутманг. Озуқа моддаларига бой маҳсулотлардан иборат парҳез сочларнинг соғлом ўсишига ёрдам беради. Шу сабаб ҳам рационга тухум, балиқ, сабзавот ва авокадо сингари фойдали маҳсулотларни киритишни унутманг. Шунингдек, соч толаларининг ўсишини жадаллаштирадиган кератин ва оқсилга бой маҳсулотлар истеъмолини ҳам канда қилмаслик керак.