«ПСЖ» сафида Чемпионлар Лигасига йўл олган Давлат Бобонов, 6 футболчиси билан хайрлашган «Локомотив» ва фаолиятини якунлаётган Агуэро. Энг сўнгги спорт янгиликлари

Дунё ва ўзбек спортига оид 13 декабрнинг энг муҳим хабарлари дайжести билан танишинг.

Ўзбекистон

Ўзбекистонлик дзюдочи Давлат Бобонов Франциянинг «ПСЖ» дзюдо клуби сафида Европа Лигасида ғолиб чиқди ва Чемпионлар Лигасига йўлланма олди.

Чехиянинг Прага шаҳрида бўлиб ўтган Европа Лигасида минтақанинг 13 та эркаклар, 4 та аёллар клублари иштирок этди. Эркаклар ўртасидаги мусобақа финалида «ПСЖ» клуби «Сент-Женевев» жамоасини 4:1 ҳисобида енгди. -90 кг вазн тоифасида ҳаракат қилган Бобонов ўз рақибини мағлубиятга учратиб, жамоасининг ғалабасига ҳисса қўшди.

Шу тариқа Токио—2020 бронза медали соҳиби парижликлар сафида Европа Чемпионлар Лигасида қатнашадиган бўлди.

«Локомотив» олти ўйинчиси билан хайрлашди

Тошкентнинг «Локомотив» клуби бир қатор футболчилар билан шартнома узайтирилмаслигини маълум қилди. Дарвозабон Жавоҳир Илёсов, ҳимоячилар Шуҳрат Муҳаммадиев, Хуршид Мухторов, ярим ҳимоячилар Садриддин Абдуллаев, Жавоҳир Сидиқов ҳамда ҳужумчи Марат Бикмаев «темир йўлчилар» сафини тарк этган.

Бокс. Ўзбекистон чемпионатининг барча финалчилари номи маълум бўлди

Бокс бўйича катталар ўртасидаги Ўзбекистон чемпионатининг барча финалчилари маълум бўлди. Финал баҳслари 14 декабрь, сешанба куни бўлиб ўтади.

• -48 кг: Асилбек Жалилов — Шодиёржон Мелиқўзиев
• -51 кг: Мироншох Ибрагимов — Хўжаназар Нортожиев
• -54кг: Дилшод Абдувалиев — Шаҳзод Музаффаров
• -57 кг: Ҳасанбой Латибохунов — Шунқор Абдурасулов
• -60 кг: Фарёзбек Ҳакимов — Хуршидбек Расулжонов
• -63,5 кг: Руслан Абдуллаев — Мужибулло Турсонов
• -67 кг: Жавлон Йўлдошев — Жаҳонгир Раҳмонов
• -71 кг: Азизбек Тожиев — Бобоусмон Ботуров
• -75 кг: Абдулазиз Абдупаттоев — Саиджамшид Жаъфаров
• -80кг: Одилжон Аслонов — Дилшодбек Рўзметов
• -86 кг: Жўрабек Тоштемиров — Тимур Миржанов
• -92 кг: Жавоҳир Тоғаймуродов — Жамшид Абдуллаев
• +92 кг: Жамшид Худойберганов — Жаҳонгир Зокиров

Жаҳон

УЕФА қароргоҳида Чемпионлар Лигасининг 1/8 финалига қуръа ташлаш маросими бўлиб ўтди. Дастлабки қуръа жараёнида техник хато сабаб «Манчестер Юнайтед» номи «Вильярреал»нинг рақиби аниқланаётган саватчага тушиб қолди. Бунинг кетидан яна учта ҳолатда қоида бузилган: «Атлетико»нинг рақиби аниқланаётганда саватга «Ливерпуль»нинг қўшилиши; «Манчестер Юнайтед»нинг «Атлетико»нинг рақиби аниқланаётган вақтда саватда йўқлиги; «Ливерпуль»нинг «Вильярреал»нинг рақиби аниқланган саватда йўқлиги.

Натижада УЕФА дастлабки қуръа маросими натижаларини бекор қилди ва унинг қайтадан ўтказилишини маълум қилди.

Қайта ўтказилган қуръа эса «Реал» клубининг норозилигига сабаб бўлди. Дастлабки жараёнда «Бенфика»га рақиб бўлган мадридликларга такрорий қуръада «ПСЖ» дуч келиб қолди. Бир томондан «Реал»нинг норозилигини тушуниш мумкин. Сабаби «Бенфика» — «Реал» жуфтлиги техник хатога қадар аниқ бўлган ва унда ҳеч қандай қоида бузилиши қайд этилмаганди.

Серхио Агуэро фаолиятини якунлайди

Marca’нинг хабар қилишича, «Барселона» ҳужумчиси чоршанба куни бўлиб ўтадиган махсус матбуот анжуманида футболчилик фаолиятини якунлаши ҳақида расман эълон қилади.

Қайд этилишича, Агуэро тахикардия сабаб ортиқ фаолиятини давом эттира олмайди. Футболчи октябрь ойида юрагидаги муаммо сабаб «Алавес»га қарши ўйинни (1:1) давом эттира олмаганди.

Аввалига футболчи уч ой майдонга туша олмаслиги айтилди, бироқ кейинчалик вазият жиддий экани маълум бўлди.

Коронавирус энди «Манчестер Юнайтед»га «ҳужум қилмоқда»

«Манчестер Юнайтед» жамоада коронавирус тарқалиши ҳақида баёнот берди. Клуб касалликнинг тарқалиш хавфини минималлаштириш учун машғулотлар базасини бир кунга ёпишини эълон қилди. Тест натижаси ижобий чиққан футболчилар эса изоляцияга олинган.

Шунингдек, клуб 14 декабрь, сешанба куни бўлиб ўтадиган «Брентфорд»га қарши ўйиннинг қолдирилиши мумкинлигини инкор этмади.

Аввалроқ «Тоттенҳэм»да коронавирус авж олгани сабабли «шпорлар»нинг Конференциялар Лигаси доирасидаги «Ренн»га қарши ўйини қолдирилганди.