13 декабрь куни бўлиб ўтган Олий Мажлис Қонунчилик палатасининг кенгашида палата ялпи мажлисларини тўғридан-тўғри эфирга узатилишини таъминлаш масаласи кўриб чиқилган. Бу ҳақда Олий Мажлис Қонунчилик палатаси спикерининг ўринбосари Алишер Қодиров маълум қилди.
Алишер Қодировнинг ёзишича, эфирга узатишни ташкил қилиш учун масъуллар жамоатчилик эътирозидан тўғри хулоса чиқариши бўйича огоҳлантирилган.
«Ҳафтанинг сешанба ва чоршанба кунлари масъул қўмиталар томонидан қонунларни ялпи мажлисга олиб чиқишга тайёр эканликларидан келиб чиқиб, Қонунчилик палатасининг ялпи мажлиси ўтказилишига қарор қилинди», — дейди у.
14 декабрь куни соат 11:00 дан бошлаб навбатдаги ялпи мажлис «Ўзбекистон», UzReport телеканаллари ҳамда Қонунчилик палатасининг Facebook’даги саҳифаси орқали жонли эфирга узатилмоқда. Кун тартибига бюджет, солиқ маъмурчилиги ва ташқи меҳнат миграцияси билан боғлиқ муҳим қонун лойиҳаларининг муҳокамалари киритилган.
«Маълумот учун, ялпи мажлисда кескин тортишувлар кам бўлиши, депутатларнинг эътиборсизлиги ёки нофаол эканлиги эмас, партия фракция йиғилишларини қизғин ўтгани ва депутатлар кўп саволларига жавоб олганини кўрсатади», — деб ёзади Қодиров.
Эслатиб ўтамиз, парламент қуйи палатасининг 10 декабрь кунги ялпи мажлиси тўғридан-тўғри эфирга бор-йўғи 48 дақиқа кетганди. Кейинроқ Қонунчилик палатаси UzReport телеканали аввалдан режалаштирилган бокс бўйича Ўзбекистон чемпионатини соат 11:00 дан бошлаб эфирга узатиш мақсадида Қуйи палата мажлисини эфирга узатишни тўхтатганини маълум қилганди.
Изоҳ (0)