Москва вилоятининг Солнечногорск шаҳарчасидаги меҳнат мигрантлари яшайдиган турар жойда 13 ноябрда содир бўлган ёнғинда 4 нафар ўзбекистонлик ҳалок бўлгани тўғрисида хабар берилганди. Ўзбекистон Ташқи меҳнат миграцияси агентлиги ижтимоий тармоқларда мазкур фуқароларнинг жасадларини ватанга қайтаришда муаммолар юзага келаётгани ҳамда бунинг учун маблағ йиғилаётгани ҳақида тарқалган мурожаатга муносабат билдирди.
Маълумот учун, Москва вилоятининг Солнечногорск шаҳарчаси Прибрежная кўчасида жойлашган қурувчиларнинг вақтинча турар жойида 2021 йилнинг 13 ноябрь куни юз берган ёнғин оқибатида ушбу вақтинча турар жойда яшаб келган меҳнат мигрантлари орасида 2 киши жароҳат олган ва 4 киши вафот этган.
Дастлабки маълумотларга кўра, вафот этганларнинг барчаси Ўзбекистон фуқаролари Ш.А. (1969 йилда туғилган), Э.У. (1998 йилда туғилган), Ш.К. (1987 йилда туғилган), А.Р. (1998 йилда туғилган), аммо жасадларни ватанга қайтариш учун қайси жасад қайси шахсга тегишли эканини аниқлаш талаб этилади.
Шунингдек, Россия қонунчилигига кўра, белгиланган тартибга мувофиқ давлат ташкилоти томонидан ўтказиладиган ДНК текшируви натижалари олингач, яъни ҳар бир жасаднинг шахси аниқлангандан кейин тергов қўмитаси рухсати билан жасадларни олиб чиқиб кетишнинг имкони бўлади.
«Шу ўринда, марҳумлар қариндошларидан чет давлат қонунлари, тартиб қоидаларини эътиборга олишларини ҳамда ижтимоий тармоқ фаолларидан уларнинг айни пайтдаги ҳиссиётларидан фойдаланиб, оммани чалғитиш, маблағ йиғишга қаратилган чиқишлар қилмасликларини сўраймиз», — дейилади муносабатда.
Эслатиб ўтамиз, 2020 йилнинг январь ойи охирларида Россиянинг Томск вилоятида юз берган ёнғинда 12 нафар ўзбекистонлик ҳалок бўлган, яна 2 нафари ушбу ёнғинда тирик қолганди. Ҳалок бўлганларнинг жасади ва тирик қолган икки фуқаро Ўзбекистонга олиб келинган.
Ўша йилнинг май ойида Россиянинг Москва вилоятидаги Раменское туманида муҳожирлар ётоқхонасида юз берган ёнғинда 6 нафар ўзбекистонлик ҳалок бўлганди.
Изоҳ (0)