Қорақалпоғистоннинг Тахтакўпир туманида хизмат олиб бораётган ходимлар 12 декабрь куни «Қўнғироткўл» овули атрофидаги чўл ҳудудида 14 та кийикни отиб ўлдириб, гўштини бўлаклаётган браконьерларни аниқлади. Бу ҳақда Давлат экология қўмитаси хабар қилди.
Маълум қилинишича, ноқонуний овчилар экология назорат инспекцияси ходимлари келаётганини кўриб, отилган ҳайвонлар, кийим-кечак, озиқ-овқат, ёқилғи, ўқ-аслаҳаларини ташлаб, номаълум йўналишда давлат рақамисиз УАЗ автомобилида қочиб кетган. Инспекторлар тахминан 5 километр масофагача уларнинг изидан борган, аммо ушлаш имкони бўлмаган.
Қайд этилишича, воқеа жойи кўздан кечирилганда отилган патрон гилзаси, идиш-товоқ, хўжалик буюмлари бўлган пичоқ, болта, ёқилғи, кийим-бошлар ҳамда «Қизил китоб»га киритилган 14 дона жайрон, 5 дона ёввойи қуён ташлаб кетилгани маълум бўлган.
Таъкидланишича, улар қолдирган ашёлар ичидан М.М. номига хориждан Т.М. исмли шахсдан 12 октябрь куни чет эл валютасида пул ўтказганини тасдиқловчи квитанция ҳам топилган.
Давлат инспекторлари томонидан ушбу ҳолат юзасидан тегишли тартибда далолатнома тузилиб, воқеа жойи видео тасвирга олинган. Айни пайтда ҳуқуқни муҳофаза қилиш органлари томонидан браконьерларни қўлга олиш чора-тадбирлари амалга оширилмоқда.
«Ҳозирда мазкур ҳолат юзасидан Орол табиатни муҳофаза қилиш прокуратураси томонидан терговга қадар текшириш ҳаракатлари олиб борилмоқда», — дейилади хабарда.
Изоҳ (0)