Маданият вазирлиги ходимлари эндиликда одатдаги иш кунида дўппи кийиб юради. Бу ҳақда маданият вазири Озодбек Назарбеков Telegram’даги каналида маълум қилди.
Озодбек Назарбеков ўзбекистонликларни 8 декабрь — Конституция куни билан табриклар экан, вазирлик мазкур ташаббус орқали миллий анъаналарни тарғиб этишда намуна бўлишни мақсад қилганини таъкидлади.
«Ҳар бир миллату-элатда миллий урф-одат, анъана ва қадриятларга ҳурмат билан ёндашилган. Хусусан, дўппи, беқасам тўн, шойи белбоғ каби халқимизнинг миллий либослари бугунги кунда ҳам ўз қадрини, баҳосини йўқотмаган. Шу қадриятларга садоқат билан қараб, миллий анъаналарни тарғиб этиш учун янги ташаббусни бошладик», — дейди вазир.
Вазир томонидан эълон қилинган видеоёзувда вазирлик ходимлари (эркаклар ҳам, аёллар ҳам) дўппи кийган ҳолда ишлаётганини кўриш мумкин.
«Барча соҳа вакилларини, ижодкорларни, Ватан фидойиларини, кўнгиллиларни ушбу ташаббусни қўллаб-қувватлашга чақириб қоламан. Қомусимиз билан ҳимояланган яна бир қадриятни ҳаётга қайтаришга шошилинг», — деди Озодбек Назарбеков.
Изоҳ (0)