Яккасаройда оилавий ажримлар кўпайгани сабабли 14 нафар маҳалла раиси ўринбосарларига хайфсан берилди

Тошкент шаҳри Яккасарой туманида оилавий ажримлар кескин кўпайгани боис бир қатор МФЙ ўринбосарларига туман ҳокими томонидан ҳайфсан интизомий жазоси берилди.

Ҳоким қарорига кўра, «Армуғон», «Бошлиқ», «Қушбеги», «Дилбулоқ», «Муҳандислар», «Мерос», «Муқимий», «Яккасарой», «Ракат», «Тўқимачи», «Абдулла Қаҳҳор», «Юнус Ражабий», «Белариқ» ва «Бобур» маҳаллаларида ажралишлар сони ортган. Шу муносабат билан маҳалла раиснинг оила, хотин-қизлар ва ижтимоий-маънавий масалалари бўйича ўринбосарларига ҳайфсан берилди.

Қайд этилишича, юқорида тилга олинган маҳаллаларда оилавий ажримлар сони кескин ошган, кўплаб оилалар ажралиш арафасида турибди. Шу билан бирга, маҳаллалар раисларининг оила, хотин-қизлар ва ижтимоий-маънавий масалалари бўйича ўринбосарлари томонидан тегишли чоралар кўрилмаган.

Шунингдек, маҳалла раислари огоҳлантирилган. Ушбу чоралар Меҳнат кодексининг 181-моддасига мувофиқ амалга оширилган.