Madaniyat vazirligi xodimlari endilikda odatdagi ish kunida do‘ppi kiyib yuradi. Bu haqda madaniyat vaziri Ozodbek Nazarbekov Telegram’dagi kanalida ma’lum qildi.
Ozodbek Nazarbekov o‘zbekistonliklarni 8-dekabr — Konstitutsiya kuni bilan tabriklar ekan, vazirlik mazkur tashabbus orqali milliy an’analarni targ‘ib etishda namuna bo‘lishni maqsad qilganini ta’kidladi.
“Har bir millatu-elatda milliy urf-odat, an’ana va qadriyatlarga hurmat bilan yondashilgan. Xususan, do‘ppi, beqasam to‘n, shoyi belbog‘ kabi xalqimizning milliy liboslari bugungi kunda ham o‘z qadrini, bahosini yo‘qotmagan. Shu qadriyatlarga sadoqat bilan qarab, milliy an’analarni targ‘ib etish uchun yangi tashabbusni boshladik”, — deydi vazir.
Vazir tomonidan e’lon qilingan videoyozuvda vazirlik xodimlari (erkaklar ham, ayollar ham) do‘ppi kiygan holda ishlayotganini ko‘rish mumkin.
“Barcha soha vakillarini, ijodkorlarni, Vatan fidoyilarini, ko‘ngillilarni ushbu tashabbusni qo‘llab-quvvatlashga chaqirib qolaman. Qomusimiz bilan himoyalangan yana bir qadriyatni hayotga qaytarishga shoshiling”, — dedi Ozodbek Nazarbekov.
Izoh (0)