Қуёшли ва аксинча қаҳратон совуқдан бошқа вақтларда ҳам лабларнинг қуриш ҳолати кузатилиши мумкин. «Домашний очаг» нашри қандай одатлар лаб билан боғлиқ ушбу муаммога сабаб бўлиши ҳақида маълумот бериб ўтади.
Лабни ялаш одати
Лаб қанчалик қуруқ бўлса, уни ялаш шунча кўп кузатилиши, бу эса қуришнинг янада ортишига олиб келиши мумкин. Сўлак таркибида терини қуритиши мумкин бўлган энзималар борлиги сабаб ҳам бу одатдан воз кечиш, қуриш ҳолати кузатилганда эса ёғ, бальзам ёки крем суртиш тавсия қилинади.
Самолётда тез-тез парвоз қилиш
Ҳатто узоқ бўлмаган парвоз ҳам тери аҳволига таъсир қилмай қолмайди. Самолётдаги қуруқ ҳаво тери, шунингдек, лаб соҳасидаги намликни тортиб олгандек бўлади гўё. Балансни тиклаш учун парвоз вақтида ва ундан аввал сув ичишни канда қилманг, шунингдек, намлантирадиган крем, гель ва бальзамлардан фойдаланинг.
Помададан ҳар куни фойдаланиш
Лаб бўёғи таркибига кирувчи айрим компонентлар терини қуритиш хусусиятига эга. Айнан шу сабаб ҳам сизга юмшоқ ва ёғли кўринган помададан фойдалангандан кейин лаб терисида қуриш кузатилади. Бунинг олдини олиш учун помадани ишлатишдан аввал лабга намлантирадиган крем суртишни унутманг.
Тўғри келмайдиган тиш пастасидан фойдаланиш
Айрим тиш пасталарининг ажралмас таркибий қисми, айниқса, тишлар орасида тош пайдо бўлишининг олдини олиш мақсадида ишлатиладиган вариантлар лаб терисига салбий таъсир қилиши мумкин. Бу каби ҳолат кузатиладиган бўлса, одатий тиш пастасини бошқасига алмаштириб кўриш тавсия қилинади.
Иссиқ душ қабул қилиш
Иссиқ сув тери, хусусан, лаб терисидаги табиий ёғни сидириб ташлайди. Шу сабаб ҳам дерматологлар иссиқ сувда ювинмасликни, душ қабул қилгандан кейин эса терига намлантирадиган воситаларни суртишни тавсия қилади.
Оғиз билан нафас олиш
Бурун битиб қолгани учун оғиз билан нафас олинганда лаб териси азият чекиши мумкин. Нафас олганда намлик зарралари лабга тегади ва шундан кейин қуриш ҳолати кузатилади. Бурун битиб қолганда тузли сув билан чайиш ва лабларни намлантирувчи бальзамлардан фойдаланиш тавсия қилинади.
Изоҳ (0)