Намангандаги 26-меҳрибонлик уйи тугатилиб, унинг негизида аниқ ва табиий фанларга ихтисослаштирилган давлат мактаб-интернати ташкил этилмоқда. Бу ҳақда «Дарё» мухбири Азизбек Абдувалиев хабар бермоқда.
Вилоят ҳокими Шавкат Абдураззақов томонидан 2021 йил 3 декабрь куни имзоланган қарорда 2021 йил 1 декабрдан эътиборан фаолияти тугатилган меҳрибонлик уйи балансидаги бино ва иншоотлар, ер майдони, асосий воситалар, товар-моддий бойликлар, мебель ва ўқув-лаборатория жиҳозлари, спорт инвентарлари ва ўқув адабиётлари янги ташкил этилаётган мактаб-интернат тасарруфига бепул ўтказилиши кўрсатиб ўтилган.
Математика ва физика фанларига ихтисослаштирилган муассасага жорий ўқув йили учун қабул квоталари белгиланади ҳамда иқтидорли ўқувчилар қабул қилинади.
Шунингдек, мазкур қарор билан 26-меҳрибонлик уйи балансидаги Чуст туманида жойлашган 120 ўринли «Меҳржон» оромгоҳи вилоят халқ таълими бошқармаси тасарруфига ўтказилмоқда. Ушбу оромгоҳ наманганлик иқтидорли ўқувчилар 4 сменада бепул дам оладиган масканга айлантирилиши кўзда тутилган.
Маълумот учун, Намангандаги 26-меҳрибонлик уйи 2004 йилда ташкил топган ва ўтган 17 йил давомида бу ерда юзлаб болалар тарбияланганди.
Изоҳ (0)