Namangandagi 26-mehribonlik uyi tugatilib, uning negizida aniq va tabiiy fanlarga ixtisoslashtirilgan davlat maktab-internati tashkil etilmoqda. Bu haqda “Daryo” muxbiri Azizbek Abduvaliyev xabar bermoqda.
Viloyat hokimi Shavkat Abdurazzaqov tomonidan 2021-yil 3-dekabr kuni imzolangan qarorda 2021-yil 1-dekabrdan e’tiboran faoliyati tugatilgan mehribonlik uyi balansidagi bino va inshootlar, yer maydoni, asosiy vositalar, tovar-moddiy boyliklar, mebel va o‘quv-laboratoriya jihozlari, sport inventarlari va o‘quv adabiyotlari yangi tashkil etilayotgan maktab-internat tasarrufiga bepul o‘tkazilishi ko‘rsatib o‘tilgan.
Matematika va fizika fanlariga ixtisoslashtirilgan muassasaga joriy o‘quv yili uchun qabul kvotalari belgilanadi hamda iqtidorli o‘quvchilar qabul qilinadi.
Shuningdek, mazkur qaror bilan 26-mehribonlik uyi balansidagi Chust tumanida joylashgan 120 o‘rinli “Mehrjon” oromgohi viloyat xalq ta’limi boshqarmasi tasarrufiga o‘tkazilmoqda. Ushbu oromgoh namanganlik iqtidorli o‘quvchilar 4 smenada bepul dam oladigan maskanga aylantirilishi ko‘zda tutilgan.
Ma’lumot uchun, Namangandagi 26-mehribonlik uyi 2004-yilda tashkil topgan va o‘tgan 17 yil davomida bu yerda yuzlab bolalar tarbiyalangandi.
Izoh (0)