Jizzaxda mahkum o‘zini Prezident Administratsiyasi xodimi deb tanishtirib, jinoyat sodir etdi

Jizzax viloyatida bir necha qonunbuzarliklari uchun ozodlikdan mahrum qilingan mahkum yana jinoyat sodir etdi, deb xabar bermoqda Ichki ishlar vazirligi.

Ma’lum qilinishicha, Toshkent viloyati Chirchiq shahridan bo‘lgan, bir necha qonunbuzarliklarni sodir etgani uchun ma’muriy jarima, axloq tuzatish, ozodlikni cheklash jazo choralari tayinlangan mahkum T.T. so‘nggi marta 2020-yil 24-avgust kuni Chirchiq shahar sudi tomonidan Jinoyat kodeksining 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan 4 yil-u 6 oy muddatga ozodlikdan mahrum qilingan.

Qayd etilishicha, unga jazo muddatini Jizzax viloyatidagi 31-son manzil koloniyasida o‘tash tayinlangan. Jazoni o‘tayotgan 28 yoshli mahkum Qashqadaryo viloyati elektr tarmoqlari korxonasi boshlig‘iga telefon qilib, o‘zini Prezident Administratsiyasi mas’ul xodimi deb tanishtirgan.

“Sizning oldingizga mening nomimdan bir ishsiz fuqaro keladi. Uni ish bilan ta’minlashda amaliy yordam ko‘rsatsangiz degandim, deb telefon qildim. O‘zimni amaldor ko‘rsatib, yolg‘on so‘zlab, noto‘g‘ri harakat qilib qo‘ydim. Chin yurakdan pushaymonman”, — degan mahkum.

Ta’kidlanishicha, u IIV huzuridagi Jazoni ijro etish departamenti va boshqa huquqni muhofaza qiluvchi organlar bilan o‘tkazilgan tezkor tadbirda daliliy ashyolar bilan qo‘lga olingan.

Jinoyat-ijroiya kodeksi 120-moddasiga (maxsus tartibli koloniyalarda jazoni o‘tash tartibi) muvofiq, u ashaddiy tartibbuzar deb topilib, unga nisbatan jazosining o‘talmay qolgan qismini manzil koloniyadan umumiy tartibdagi koloniyaga ko‘chirish jazosi qo‘llanilgan. Hozirda holat yuzasidan prokuratura organlari tomonidan tergovga qadar tekshiruv harakatlari olib borilmoqda.