Шавкат Мирзиёевнинг Қозоғистонга ташрифи давомида 6 декабрь куни Нур-Султонда Ўзбекистон элчихонаси янги биносининг очилиш маросими бўлиб ўтди. Бу ҳақда Президент матбуот хизмати хабар қилди.
Фото: Президент матбуот хизмати
Маълум қилинишича, Шавкат Мирзиёев ва Қосим-Жўмарт Тўқаев рамзий боғични кесиб, янги бинони очиб берган. Икки мамлакат мадҳиялари янграган. Президентлар элчихонада яратилган шароитлар билан танишган.
Фото: Президент матбуот хизмати
Қайд этилишича, замонавий бино ўзбекистонлик қурувчилар томонидан қурилган, хоналар миллий услубда безатилган. Дипломатик ваколатхона ҳудудида асосий бино, консуллик бўлими, ходимлар учун уй, дипломатик миссия раҳбарининг қароргоҳи, кутубхона, болалар ва спорт майдончалари жойлашган.
Фото: Президент матбуот хизмати
Музокара хоналари, анжуманлар залида барча шароитлар мавжуд. Интерфаол ускуналар музокараларни онлайн шаклда ўтказиш имконини беради. Консуллик фаолияти учун электрон навбат тизими ўрнатилган.
Фото: Президент матбуот хизмати
Давлат раҳбарлари элчихонанинг Фахрий меҳмонлар китобида қайд ёзиб қолдирган.
Фото: Президент матбуот хизмати
Эслатиб ўтамиз, Шавкат Мирзиёев 5 декабрь куни Қосим-Жўмарт Тўқаевнинг таклифига биноан Қозоғистонга жўнаб кетганди. Уни Нур-Султонда Қозоғистон президенти кутиб олди.
Ташриф чоғида Оқ ўрдада Шавкат Мирзиёев ва Қосим-Жўмарт Тўқаев тор доирада музокаралар ўтказди ва икки томонлама ҳамкорликнинг муҳим вазифаларини белгилаб олди. Шунингдек, Шавкат Мирзиёев Нур-Султондаги «Ватан ҳимоячилари» монументига гул қўйди ва Ўзбекистон ва Қозоғистон ўртасида иттифоқчилик муносабатлари тўғрисидаги декларация имзоланди. Бундан ташқари, Шавкат Мирзиёев Нурсултон Назарбоев билан учрашди.
