Ноябрь охирида Туркиянинг Porlanmaz компанияси таклифига биноан «МузА» савдо белгиси остида машҳур бўлган Sabfatek компаниясининг бир гуруҳ қандолатчи усталари Конья шаҳрига ташриф буюришди. Ушбу саёҳатдан кўзланган мақсад, туркиялик истеъмолчиларни ўзбекистонлик пишириқ усталарининг маҳсулотлари билан яқиндан таништириш, турк новвойлари билан тажриба алмашиш, Туркияда бизнесни кенгайтириш имкониятларини кўриб чиқишдан иборат эди. Ўзбекистонда машҳурликка эришиб улгурган 12 турдаги маҳсулотлар туркиялик истеъмолчилар эътиборига ҳавола этилди. Купели новвойхонасида ўзбек маҳсулотларининг тақдимоти ва дегустацияси бўлиб ўтди. Тақдим этилган барча маҳсулотлар Конья аҳолиси томонидан юқори баҳоланди, айниқса, қатламали қулоқчалар, қатламали таёқчалар, сулидан тайёрланган печеньелар ва майизли роллар барчанинг меҳрини қозона олди. «МузА» хамиридан тайёрланган уй сомсаси эса барча иштирокчиларни лол қолдирди.
Саёҳат Туркия оммавий ахборот воситалари томонидан кенг ёритилди. Туркиянинг энг йирик ахборот агентлиги Anadolu Ajansi ўз саҳифаларида «Биргаликда амалга оширилган саъй-ҳаракатлар натижасида, Туркия ва Ўзбекистон ўртасида мазали кўприк барпо этилди» деб номланган мақолани эълон қилди.
Туркиянинг Konhaber.com, Merhabahaber.com, Mynet haber, BBN Magazin каби кўплаб нашрлари ўзбекистонлик меҳмонларга бағишланган мақолаларни ўз саҳифаларига жойлаштирди.
Конья шаҳар ҳокимиятида ўзбекистонлик меҳмонларга бағишланган қабул ташкил этилди. Шунингдек, меҳмонлар саёҳат давомида Жалолиддин Румий мақбараси ва Чатал Хююк қадимий манзилгоҳини зиёрат қилишди.
Шу ўринда Чатал Хююк манзилгоҳини алоҳида тилга олиш лозим. Ушбу манзилгоҳ инсоният тарихидаги энг қадимий ва энг йирик шаҳарлардан бири. Тахминан 9000 йил олдин бу ерда 8 мингдан ортиқ инсон истиқомат қилган. Манзилгоҳ аҳолиси тўртбурчак шаклидаги уйларда яшаган, деворлари эса ҳаётдан олинган суратлар билан безатилган. Дарвоқе, машҳур америкалик актёр Морган Фриман иштирокида Чатал Хююк ҳақида қизиқарли ҳужжатли фильм суратга олинган.
Коньяга саёҳатдан сўнг, албатта, Чатал Хююк манзилгоҳига ташриф буюришингиз лозим.
Туркиялик ҳамкорлар ва истеъмолчилар билан ўрнатилган мустаҳкам ва самимий дўстлик алоқаларини «МузА» вакилларининг асосий ютуқларидан бири сифатида кўрсатиб ўтишимиз мумкин. Конья ва Чатал Хююк — сизларга раҳмат, биз яна қайтамиз!
Маълумот шериклик ҳуқуқи асосида тайёрланди.
Изоҳ (0)