Сирдарёдаги иккита маҳаллада радиоузел ташкил қилинди, дея хабар бермоқда вилоят ҳокимлиги матбуот хизмати.
«Авваллари маҳаллалар марказида ўрнатилган радиоузел орқали янгиликларни бериб бориш, муҳим эълонларни маҳалла аҳлига тезкор етказишнинг имконияти бор эди.
Ҳозирги вақтда маҳаллаларда ҳар доим ҳам ҳаммани йиғиб гаплашиш учун имконият ва шарт-шароитлар бўлавермайди. Маҳалла раисларининг аҳоли билан очиқ мулоқоти учун етарли шароит йўқ. Бунинг учун алоқа воситасининг ўзи йўқ», — дейилади хабарда.
Ушбу муаммони ҳал қилиш мақсадида тажриба-синов тариқасида дастлаб Сирдарё туманининг «Илғор» ҳамда «Элобод» маҳалласида радиоузел ташкил қилинди.
Радиоузел эшиттиришларида қонун, қарор ва фармойишлар тарғиботи, ёшларни ватанпарварлик руҳида тарбиялаш, соғлом турмуш тарзини кенг тарғиб қилиш, фуқароларнинг ҳуқуқий маданиятини ошириш масалаларига алоҳида эътибор қаратилади.
Шунингдек, миллий қадриятларни тараннум этувчи қўшиқлар, аудиокитоблар, ўзбек ва жаҳон мусиқалари аҳоли эътиборига эшиттириб борилади. Келгусида вилоятнинг барча туман (шаҳар)ларининг чекка маҳаллаларида радиоузеллар ўрнатилиши режалаштирилган.
Изоҳ (0)