Тошкентда 14 ёшли бола ўзганинг Damas’ини олиб қочаётганида эгаси уни тутиб олди

Тошкентда ўзганинг Damas’ини олиб қочишга уринган 14 ёшли болага жиноят иши қўзғатилди. Бу ҳақда ИИВ ҳузуридаги Тергов департаменти хабар берди.

Маълум қилинишича, 29 ноябрь куни тунги соат 03:30 ларда Учтепа тумани 13-мавзе 8-уй олдида бўлган номаълум шахс 40 ёшли Р.О.га тегишли бўлган Damas’ни қаровсиз ҳамда калити ўт олдириш жойида қолдирилганидан фойдаланиб, унинг олд эшигини темир линейка ёрдамида очган.

Сўнг машинани ўт олдириб, ортга 5 метр ҳайдаган вақтида ушбу шовқин-сурондан уйғониб қолган автомашина эгаси кўчага шошилиб чиқиб, автомашина ўчиб қолганидан фойдаланиб, қонунбузарни ушлаган ва ҳуқуқни муҳофаза қилувчи органларга хабар берган.

Олиб борилган терговга қадар текширув натижасида Damas’ни олиб қочишга уринган шахс Сурхондарё вилояти Шўрчи туманида яшовчи вояга етмаган 14 ёшли Т.Ж. экани аниқланган.

Мазкур ҳолат юзасидан Учтепа тумани бўйича ИИО ФМБ ҳузуридаги Тергов бўлими томонидан Т.Ж.га нисбатан Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилган.

Ҳозирда тергов ҳаракатлари олиб борилмоқда.

Аввалроқ Тошкентнинг Чилонзор туманида Nexia-3 ни олиб қочган 25 ёшли қиз ушлангани, Tracker’ни олиб қочган 13 ёшли бола уни тўхтатган ЙПХ ходимларидан қочиб кетгани ҳақида хабар берилган эди.