Cobalt Qozog‘iston avtomobil bozorida 8 oydan buyon yetakchilikni saqlab kelmoqda

Chevrolet Cobalt Qozog‘iston bozorida avtomobillar sotuvi bo‘yicha yetakchilikni saqlab qoldi. Bu haqda Qozog‘iston avtomobil biznesi assotsiatsiyasi ma’lumotlariga tayanib, UzAuto Motors matbuot xizmati xabar berdi.

Ma’lum qilinishicha, 2021-yilning oktabrida qozog‘istonliklar 1428 dona Cobalt sotib olgan. Eng ko‘p sotilgan modellar reytingida ikkinchi o‘rinni Nexia (848 dona), uchinchi o‘rinni Hyundai Accent (590 dona) egallagan.

Oktabr oyida jami 2 567 dona Chevrolet avtomobillari sotilgan bo‘lib, bu mamlakat yangi avtomobillar bozori umumiy hajmining 28 foizini tashkil etadi.

Eslatib o‘tamiz, mart oyidan buyon Qozog‘iston bozorida avtomobillar sotuvi bo‘yicha birinchi o‘rinni egallab kelmoqda. Shunday qilib ushbu model 8 oydan buyon yetakchilikni qo‘ldan boy bermadi.

UzAuto Motors birinchi yarim yillikdagi eksportining 94 foizi ushbu mamlakatga ketgan, eksportning o‘zi ishlab chiqarishning qisqarishi fonida ikki barobar oshgan — xuddi UzAuto Motors’ning sof foydasi kabi.

Noyabr oyida berilgan ma’lumotga ko‘ra, UzAuto Motors 9 oyda eksport qilgan avtomobillarning 96 foizi Qozog‘iston hisobiga to‘g‘ri keldi.

O‘zbekistonda esa ushbu modelga navbatlar o‘sib bormoqda. O‘tgan haftada Cobalt uchun navbatda turganlar 16 296 nafarga yetgandi.  UzAvto Savdo bot ma’lumotlariga ko‘ra, ayni paytda ular soni 17 684 kishini tashkil qilmoqda.