Озишга ёрдам берадиган тонгги смузи: Ортиқча вазндан қутилишни истайдиганлар учун оддий усул

Ижтимоий тармоқларда вазн ташлашда яхши самара берадиган усуллар кўплаб топилади. Масалан, TikTok’да лимон қаҳванинг оздириши ҳақидаги ғоя машҳурликка эришган. Мутахассислар эса таркибида қаҳва бўлган бошқа бир рецепт яхши самара беришини маълум қилган. Аммо бу усул иш бериши учун уни машғулот билан умумлаштириш керак бўлади.

Instagram ва YouTube’даги фитнес юлдузи сифатида маълум бўлган физиотерапевт Лилли Сабри обуначилари сарвқомат бўлиш ва гўзаллик сири билан бўлишиб келади. У кайфиятни кўтариб, эрталабдан киши ўзини яхши ҳис қилишига ёрдам берадиган протеинли коктейл рецепти билан бўлишди.

«Гўшт истеъмол қилмаганим, аммо рационимда оқсил етарли эканига ишончим комил бўлишини истаганим сабаб ҳам, деярли ҳар куни, таркибида қаҳва бўлган протеинли смузи истеъмол қиламан», — дейди у.

Кунни тўғри бошлаш учун Лилли, ерёнғоқ ва қаҳва қўшилган смузи тайёрлайди. Бунинг учун олдиндан аччиқ қилиб тайёрлаб олинган қаҳванинг икки ҳиссасига бир нечта муз бўлаги, сули сути қўшишни афзал билади. Баъзида эса кокос сутидан ҳам фойдаланиши мумкин. Асосийси музлатилган ярим бўлак банан қўшишни унутмаслик керак. Ерёнғоқ пастаси қўшилганидан кейин эса блендер билан аралаштиради.

Унинг таъкидлашича, мазкур смузини тайёрлашда ишлатиладиган маҳсулотлар ҳамиша уйида шай бўлади. У бананни олдиндан кўп миқдорда сотиб олиб, кейин ярмини бўлиб музлаткичга қўйиб қўяди. Тухум билан нонушта қиладиган аёл, тушликка гуруч ёки макаронли таомларни афзал билади. Тамадди учун протеинли батончалар ёки ерёнғоқли банан ейди.

Парҳез, фикрлаш тарзи муҳим эканига қарамай, озиш жараёнида энг асосийси машқларни бажариш саналади. Тананинг бел қисми ихчамлашиши учун пилатес билан шуғулланиш керак деб биладиган аёл, жисмоний фаоллик борасида шахсий хоҳиш ва бажариш давомида тана қандай реакция билдиришидан келиб чиқиб танлов қилиш кераклигини таъкидлайди.