Клиплардаги образлари билан эл назарига тушган ўзбек актёр ва актрисалари (видео)

Ҳозирги кунда ўзбек киносида ўз ўрнига эга актёр ва актрисаларнинг кўпчилиги бош қаҳрамон образига таклиф этилишидан аввал кичик ролик ва клипларда суратга тушган. Энг қизиғи, баъзи кичик роллар ҳам актёрларга кутилмаган омад  келтирган.

Феруза Собитова «Болалагим»

Феруза Собитова Шоҳрух рэпернинг «Болалагим» клипи орқали танилган десак, муболаға бўлмайди. Бу фикрни актрисанинг ўзи ҳам бир нечта интервьюларида тасдиқлаган. Актриса клипдан аввал «Соҳибқирон Амир Темур», «Суратдаги сир» ва «Қайдасан, муҳаббат» фильмларида суратга тушган. Аммо уни томошабинларга клипдаги салбий роли яқинроқ таништирган. Клип 2006 йили суратга олинган.

Муқаддас Саъдуллаева «Ёр-ёр»

Муқаддас Саъдуллаева асли мутахассислиги бўйича актриса эмас. Шу боис фаолиятининг илк босқичларида фильмларда суратга тушмаган. Уни халққа хонанда Ғайрат Усмоновнинг «Ёр-ёр» клипи  танитган десак, хато бўлмайди. Клипдан сўнг актриса 2012 йилда «Салом севги, хайр севги» фильмида дебют ролини ижро этган.

Ситора Алимжонова «Соғиниб»

Актриса Ситора Алимжонова Улуғбек Раҳматуллаевнинг «Соғиниб» клипида суратга тушгач, томошабинлар эътиборини қозонган. Ундан аввал у 2012 йилда «Кореялик келин» фильмида суратга тушганди. Аммо клипдаги иштироки унга омад келтирган.

Мадина Файзиева «Жумагул»

Жасур Умировнинг «Жумагул» клипида суратга тушган Мадина Файзиева қатор фильмларда асосий ролларни ижро этган бўлишига қарамай, ҳамон уни томошабинлар Жумагул деб билишади. Клипдаги иштироки унга анча омадли келган ва халқ орасида Жумагул номи билан танилган.

Суғдиёна Азимова  «Лайлойимсан»

Суғдиёна Азимова 2011 йил суратга олинган «Энагалар» фильмида суратга тушган. Ундан кейин ҳам қатор фильмларда роллар ижро этган, аммо натижалар кутилганидек бўлмаган. Улуғбек Раҳматуллаевнинг «Лайлойимсан» клипидаги иштирокидан сўнг халқ уни яқиндан таний бошлаган. Албатта, бунга қўшиқнинг халқ орасида машҳурликка эришгани ҳам сабаб бўлган.

Шаҳло Темирова «Алдоқчи»

Актриса Шаҳло Темирова театр ва кино актрисаси бўлса-да, уни халққа танитган хонанда Бунёдбек Саидовнинг «Алдоқчи» клипидаги иштироки бўлган. Мазкур қўшиқ оммалашгани ва актрисанинг клипдаги профессионал ижроси клипнинг халқ эътиборига тушишига сабаб бўлган.

Райҳон Асадова «Бахтингни топ»

Кейинги пайтларда тарихий фильмларда асосий ролларни ижро этаётган актриса Райҳон Асадова ҳам илк ролларини клипларда ижро этган. У Сардор Тоировнинг «Ҳасрат», «Севмасам» ва «Бахтингни топ» клипларидаги роллари билан томошабинлар эътиборига тушган.

Йигитали Мамажонов «Жоним соғиндим»

Актёр Йигитали Мамажонов фильмларда суратга тушишдан аввал каскадёр сифатида фаолият юритган. Йигиталини Лоланинг «Жоним соғиндим» клипидаги образи элга танитган. Кейинчалик Лола «Соғиндим» деб номланган клипни ҳам суратга олдирган. Ундан сўнг Йигитали  «Ёзсиз йил» ва «Онагинамнинг орзуси» фильмларига таклиф этилган.

Юлдуз Ражабова «Омадим келмади»

Актриса Юлдуз Ражабова илк ролини 2013 йилда «Ҳазон» фильмида ижро этган. Талаба қизнинг натижалари у қадар ёмон бўлмаган, аммо клиплардаги иштироки уни халққа янада яқиндан танитган. У 2013 йилда Улуғбек Раҳматуллаевнинг «Омадим келмади»  қўшиғига ишланган клипда суратга тушган. Клип томошабинлар томонидан илиқ қарши олинган ва актрисага омад келтирган. Ундан сўнг Сайёра Қозиеванинг «Ёмғирлар», Сардор Мамадалиевнинг «Дил яраси», Маҳмуд Намозовнинг «Кўза афсонаси» ва Сардор Раҳимхоннинг «Бибихоним» клипидаги иштироки ҳам Юлдузнинг халқ орасида танилишига ўз ҳиссасини қўшган.