500 минг гектардан зиёд томорқадан самарали фойдаланиш учун, келгуси йил 100 миллион доллар ажратилади. Бу ҳақда президент Шавкат Мирзиёев раислигида бўлиб ўтаётган қишлоқ хўжалиги масалаларига бағишланган видеоселектор йиғилишида давлат раҳбари маълум қилди.
Маълум қилинишича, томорқада деҳқончиликни йўлга қўйиш учун, оилавий тадбиркорлик дастури шартлари асосида имтиёзли кредитлар берилади. Самарали фаолият юритаётган томорқа хизмати корхоналари негизида 35 та томорқа хизмати кластери ташкил этилади.
Уларда, кўчатчилик иссиқхонаси, кичик техника парки, совиткичли омборхона, қуритиш, саралаш ва қадоқлаш цехи, инкубатор, ем ишлаб чиқариш каби хизматлар жамланади.
Масалан, Шароф Рашидов тумани «Гулчи опа томорқа хизмати» раҳбари Шарофат Нориева 150 та хонадонга гул кўчати, товуқ, қорамол ва эчки тарқатиб, тайёр маҳсулотни сотиб олишни йўлга қўйган. Натижада ҳар бир томорқа эгаси 300 миллион сўмдан даромад олган.
Томорқада етиштирилган маҳсулотларни кафолатли харид қилиш мақсадида, ҳар бир туманда кооперациялар ташкил этилиб, улар омборхоналарни жиҳозлаши, қуритиш, саралаш ва қадоқлаш ускуналари харид қилишига 30 фоизгача субсидия берилади.
Томорқа хизмати корхоналарига уруғлик, кўчат, мини техника харид қилиши ҳамда айланма маблағ учун, ҳоким ёрдамчилари кафиллиги асосида, 300 миллион сўмгача гаровсиз кредит берилади.
Сув таъминоти оғир томорқа ерлари ва фойдаланишдан чиққан майдонларни суғориш харажатларининг бир қисмини бюджетдан қоплаш тартиби 2026 йил 1 январга қадар узайтирилади ва бунга келгуси йилда 50 миллиард сўм ажратилади.
Изоҳ (0)