500 ming gektardan ziyod tomorqadan samarali foydalanish uchun, kelgusi yil 100 million dollar ajratiladi. Bu haqda prezident Shavkat Mirziyoyev raisligida bo‘lib o‘tayotgan qishloq xo‘jaligi masalalariga bag‘ishlangan videoselektor yig‘ilishida davlat rahbari ma’lum qildi.
Ma’lum qilinishicha, tomorqada dehqonchilikni yo‘lga qo‘yish uchun, oilaviy tadbirkorlik dasturi shartlari asosida imtiyozli kreditlar beriladi. Samarali faoliyat yuritayotgan tomorqa xizmati korxonalari negizida 35 ta tomorqa xizmati klasteri tashkil etiladi.
Ularda, ko‘chatchilik issiqxonasi, kichik texnika parki, sovitkichli omborxona, quritish, saralash va qadoqlash sexi, inkubator, yem ishlab chiqarish kabi xizmatlar jamlanadi.
Masalan, Sharof Rashidov tumani “Gulchi opa tomorqa xizmati” rahbari Sharofat Noriyeva 150 ta xonadonga gul ko‘chati, tovuq, qoramol va echki tarqatib, tayyor mahsulotni sotib olishni yo‘lga qo‘ygan. Natijada har bir tomorqa egasi 300 million so‘mdan daromad olgan.
Tomorqada yetishtirilgan mahsulotlarni kafolatli xarid qilish maqsadida, har bir tumanda kooperatsiyalar tashkil etilib, ular omborxonalarni jihozlashi, quritish, saralash va qadoqlash uskunalari xarid qilishiga 30 foizgacha subsidiya beriladi.
Tomorqa xizmati korxonalariga urug‘lik, ko‘chat, mini texnika xarid qilishi hamda aylanma mablag‘ uchun, hokim yordamchilari kafilligi asosida, 300 million so‘mgacha garovsiz kredit beriladi.
Suv ta’minoti og‘ir tomorqa yerlari va foydalanishdan chiqqan maydonlarni sug‘orish xarajatlarining bir qismini budjetdan qoplash tartibi 2026-yil 1-yanvarga qadar uzaytiriladi va bunga kelgusi yilda 50 milliard so‘m ajratiladi.
Izoh (0)