Келгуси 2022 йилда пахта ва ғалладан бўшаган 80 минг гектар ерлар аҳолига бўлиб берилади. Бир ой муддатда ушбу ерлар лотларга бўлиб, очиқ танловга чиқарилади. Бундан ташқари, 70 минг гектар ерлар «оборот»га қайтарилади. Бу ҳақда президент Шавкат Мирзиёев раислигида бўлиб ўтаётган қишлоқ хўжалиги ерларини ижарага бериш, мева-сабзавотчилик кластерлари ҳамда томорқа хўжаликлари фаолиятини янада ривожлантириш борасидаги устувор вазифалар мавзусидаги видеоселектор йиғилишида маълум қилинди.
«Келгуси йилда пахта ва ғалладан қисқартириладиган 80 минг гектар майдонларни аҳолига бўлиб бериш бўйича куни кеча қарорни имзоладим. Ушбу ерлар аҳолига деҳқон хўжалиги ташкил этиш учун, 10 сотихдан 1 гектаргача 10 йил муддатга, очиқ электрон танлов ўтказиш орқали ижарага берилади. Бунда, асосий мезон – томорқадан самарали фойдаланиш ва яратиладиган иш ўринлари бўлади. Танловда, деҳқончиликда тажрибаси бор аҳоли, шунингдек, 3 та дафтарга кирган оилалар қатнашади», – деди Мирзиёев.
Очиқ электрон танловда ҳар бир талабгорнинг ҳозиргача ўз томорқасидан қандай фойдаланаётганига янги жорий этилаётган ҳоким ёрдамчилари баҳо беради. Ушбу ерларда деҳқончилик қилиш учун, оилавий тадбиркорлик дастурлари доирасида сабзавот, полиз ва дуккакли экинлар экишга 6 ойлик имтиёзли давр билан 2 йилгача кредит ажратилади.
«Деҳқон хўжалиги ердан оқилона фойдаланмаса, ижара шартномаси суд орқали муддатидан олдин бекор қилинади. Буни ҳар бир деҳқонга қонуний тушунтириш керак», – дея қайд этди давлат раҳбари.
Масъуллар бир ой муддатда 80 минг гектар ерларни лотларга бўлиб, очиқ танлов (аукцион)га чиқариши белгиланди. Ҳар бир ер участкаси 2 кунда кадастр рўйхатидан ўтказилиши шартлиги, бунда, аҳоли давлат рўйхатидан ўтказиш бўйича йиғимлардан озод қилиниши (1 миллион 350 минг сўм) билдирилди.
Давлат раҳбари Давлат солиқ қўмитаси ва Кадастр агентлиги қанча ер майдони аҳолига ажратилгани, бу ерларда нечта деҳқон хўжалиги ташкил этилгани тўғрисидаги маълумотларни ҳар ўн кунда Президент Администрациясига киритиб боришини айтди.
«Масъуллар вилоят ҳокимлари билан бирга, 2021 йил 1 мартга қадар барча қишлоқ хўжалиги ерларининг кадастр рўйхатидан ўтказилишига масъул ва бирорта ҳудуд раҳбарининг бу масалада ‘ўйин қилишга’ ҳаққи йўқ. Бўлди энди, югургани сомонхонагача. Туман ҳоким ва прокурорлари ўғирлик қилгани учун жазосини олмоқда. Кимда шунақа ‘касаллик’ бўлса, лавозимдан кетинглар», – деди президент.
Шунингдек, «Agrobank», «Халқ банки» ва «Микрокредитбанк» бир ой муддатда деҳқон хўжаликларига онлайн кредит ажратиш бўйича мобил платформани ишга тушириши айтилди.
Изоҳ (0)