Австралия Буюк Британия ва АҚШ билан тузган янги мудофаа альянси — AUKUS доирасида ўзининг денгиз флотини ядровий сувости кемалари билан жиҳозлаш дастурини расман бошлади. Бу ҳақда «Korrespondent.net» хабар берди.
Хабарга кўра, 22 ноябрь, душанба куни Австралия мудофаа вазири Питер Даттон америкалик ва британиялик дипломатлар билан биргаликда уч давлат ўртасида ядровий кучларни ўрнатиш тўғрисидаги махфий маълумотлар алмашинувини назарда тутадиган келишувни имзолаган.
Сентябрь ойида мазкур мамлакатлар AUKUS альянси тузилганини эълон қилиб, бу қадамни Хитой-Америка рақобати кучайиб бораётган Тинч океани минтақасида стратегик тарангликка қарши туриш зарурати билан изоҳлаган эди.
«Келишув бизга ҳамкорлик қилиш имконини беради, бу ўзаро мудофаа имкониятимизни оширади», — деди АҚШ президенти Жо Байден 19 ноябрь куни Канберрадаги шартнома имзолаш маросими олдидан.
AUKUS билан тузилган келишув туфайли Австралия узоқ масофали миссияларни бажаришга қодир саккизта энг замонавий ядровий сувости кемасини қабул қилади. Шунингдек, келишув мамлакатлар ўртасида кибер разведка маълумотлари, сунъий интеллект технологиялари ва бошқа техник ишланмалар алмашинувини кўзда тутади.
Шу тарзда АҚШ тарихда иккинчи марта ядровий сувости кемаларини яратиш бўйича ўта махфий технологияларни бошқа давлат билан бўлишмоқда. Вашингтон илк бор иттифоқчи давлат Буюк Британияни 1958 йилда ядровий технологиялар билан таъминлаган эди.
AUKUS альянсининг тузилиши Парижни ғазаблантирди, чунки янги ҳамкорлик фонида Австралия Франциянинг Naval Group ҳарбий кемасозлик компанияси билан тузган рекорд даражада қиммат шартномани тўхтатди.
Австралия уни 2016 йилда имзолаган, шартнома 12 та оддий сувости кемасини қуришни назарда тутган. Лойиҳага 90 миллиард Австралия доллари (66 миллиард АҚШ доллари) талаб қилиниб, бу шартнома Австралия денгиз флоти тарихидаги энг қиммати бўларди.
Франция ташқи ишлар вазири Жан-Ив Ле Дриан шартноманинг бекор қилинишини «орқадан пичоқ уриш» деб атаган. Бекор бўлган шартнома туфайли Франция АҚШ билан бирга Чесапик денгиз жангининг 240 йиллигига бағишланган тантаналарни нишонлашдан бош тортган. Париж маслаҳатлашувлар учун АҚШ ва Австралиядаги элчиларини чақириб олди. Еврокомиссия раҳбари Урсула фон дер Ляен иттифоқчиларнинг Францияга нисбатан ҳаракатларини номақбул деб атади.
Изоҳ (0)