«Норт»дан «Қора бева»гача: америкалик актриса Скарлетт Йоханссон 37 ёшда

Бўлажак Голливуд юлдузининг исми Маргарет Митчеллнинг «Шамолларда қолган ҳисларим» фильми қаҳрамони Скарлетт O’Хара шарафига қўйилган. Скарлетт ва унинг эгизак укаси Ҳантер 1984 йил 22 ноябрда Нью-Йоркда туғилган. Йоханссон Нью-Йоркнинг энг нуфузли ва қиммат ҳудуди бўлган Манхэттенда туғилиб-ўсган бўлишига қарамай, бўлажак актрисанинг оиласи аранг кун кечирган.

Онаси тўрт фарзандининг тарбияси билан шуғулланган, отаси эса архитектор бўлган. Интервьюларнинг бирида Йоханссон улар нафақа асосида яшаганини айтган. Оилада тўрт нафар болани боқиш учун ота-она камбағал оилаларга мўлжалланган купондан фойдаланган. Болалигиданоқ ота-онасининг жанжалларига гувоҳ бўлган Скарлетт чуқур психологик травма олган. Кейинчалик ҳам у «хафа қилишларига доим тайёр туриш» инстинкти ҳали ҳам унга хос эканлигини тан олади.

Скарлеттнинг унутилмас, ажойиб болалик даврлари бўлмаган. Скарлетт ёшлигиданоқ Ли Страсбергнинг актёрлик мактабида таълим олади: кино унинг орзуси эди. Ота-онаси ажрашгандан сўнг кичик Скарлетт онаси билан Лос-Анжелесга кўчиб ўтади, лекин у мунтазам равишда отасининг олдига — Нью-Йоркка келиб туради. 8 ёшида у «Софистика» фильмининг театрлаштирилган спектаклида Итан Хоук билан бирга рол ижро этди, ҳатто шу ёшда ҳам унинг ажойиб қобилиятлари кўплаб киноижодкорларга манзур бўлди. 9 ёшида у биринчи марта Роб Рейнернинг «Норт» оилавий комедиясида рол ўйнади. «Кичик Скарлетт болаларга хос бўлмаган истеъдодга эга!», – деган эди таниқли режиссёр.

Скарлетт 12 ёшида ўзининг биринчи бош ролини «Ўғрилар» комедик-драмасида ўйнади. Бунинг учун Йоханссон Independent Spirit Awards мукофотининг «Энг яхши аёл роли учун» номинациясида ғолиб бўлди. Бир нечта фильмлардаги ролларидан сўнг 14 ёшли Скарлетт Роберт Редфорднинг «От шайдоси» мелодрамасида намоён бўлди. Ногирон қиз Грэйс Маклин роли ёш актрисага Америкада катта шуҳрат келтирди. Шундан кейингина актрисага кўплаб таклифлар келиб тушди («Мавжуд бўлмаган одам», «Арвоҳлар олами», «Американча қўшиқ» ва бошқалар).

Скарлетт Йоханссон 19 ёшида София Копполанинг «Таржима машаққати» фильмидаги ролидан сўнг, Қўшма Штатлардан ташқарида ҳам шуҳрат қозонди. Мазкур фильмдаги Шарлотта роли унга бир қатор нуфузли мукофотларни, жумладан, BAFTA’нинг «Энг яхши актриса» мукофотини ҳам олиб келди. 2003 йил Скарлетт голландиялик рассом Ян Вермеернинг хизматкори ролини ўйнаган «Марварид сирғали қиз» драмасида рол ижро этди. Шу роли сабабли «Олтин глобус»га номзоди қўйилди.

Шундан сўнг Скарлеттни таниқли режиссёрлар ҳам ўз лойиҳаларига таклиф қилишни бошлайди. У Майкл Бейнинг «Орол» фантастик жангари фильмида, Кристофер Ноланнинг «Обрў» триллерида, Вуди Алленнинг «Маtch Point» драмасида, Брайан де Палманинг «Қора орҳидея» триллери ва бошқа машҳур фильмларда рол ўйнайди. «Матч Point»даги ролидан сўнг 21 ёшли Скарлетт Вуди Алленнинг янги илҳом парисига айланади ва яна иккита картина — «Сенсация» (2006) ва «Вики Кристина Барселона» (2008) фильмларида биргаликда ишлашади.

2008 йилда Йоханссон «Яна бир Болейн авлоди» тарихий драмасида дугонаси Натали Портман билан биргаликда Мария Болейн ролини ўйнади. Шу билан бирга, 24 ёшли Скарлетт қўшиқчи ва режиссёр сифатида дебют қилади. Унинг биринчи Anywhere I Lay My Head альбоми актрисанинг чуқур, мафтункор тембри туфайли мусиқа танқидчилари томонидан яхши кутиб олинди. Аммо юлдузнинг «Нью-Йорк, мен сени севаман» қисқа ҳикоялар тўплами асосида ишланган оқ-қора қисқа метражли фильми муваффақиятсизликка юз тутиб, продюсерлар танқидига учрайди. Шундан кейин Скарлетт бир муддатга режиссёрлик фаолиятини тарк этади. Аммо у актриса сифатида жуда кўп фильмларда ўзига топширилган ролларни қойилмақом тарзда ижро этган. 2010 йилда у «Темир одам 2» фильмида махсус агент Наташа Романова ролини ўйнайди ва 2012 йилда у «Қасоскорлар» комиксининг экранлаштирилган вариантида пайдо бўлди. Скарлетт Йоханссон 27 ёшидаёқ Голливуднинг Шон-шуҳрат хиёбонида ўз юлдузига эга бўлди.

Скарлетт турли лойиҳаларда фаол иштирок этишни давом эттирди («Люси» (2014), «Ғилдиракдаги ошпаз» (2014), «Яшасин, Цезарь!» (2016), «Қурол шарпаси» (2017), «Жуда ёмон қизлар» (2017 ), «Қуёнча Жожо» (2019), «Никоҳ ҳақида ҳикоя» (2019) ва Marvel’нинг бир нечта фильмларда суратга тушди. 2021 йилда эса мазкур франшизанинг «Қора бева» номли фильми прокатга чиқарилди.

«Қора бева» лентаси 9 июлдан бошлаб кинотеатрлар ва Disney+ да намойиш этилди. Дастлабки дам олиш кунлари давомида картина 218 миллион доллар тўплаган. Бутун дунё бўйлаб касса йиғимлари эса 378 миллион доллардан ошади. Disney маълумотларга кўра, шунингдек, фильм прокатнинг дастлабки 20 куни давомидаги оқимли харидлар сабаб 60 миллион долларга яқин маблағ ишлаган.

Скарлеттнинг шахсий ҳаёти ҳақида гап кетганда, журналистлар унинг кўплаб эркаклар билан бўлган муносабатлари ҳақида ёзишган, аммо буларнинг барчаси ҳам ҳақиқат эмас. У 2008 йилда Райан Рейнолдсга турмушга чиқди, аммо жуфтлик орадан 3 йил ўтиб 2011 йилда ажрашди. Актрисанинг француз журналисти Роман Дориак билан кейинги никоҳидан қиз фарзанд дунёга келди, аммо бу никоҳ ҳам ажралиш билан якунланди.

2020 йилда Йоханссон учинчи марта — Saturday Night Live дастури комик актёри ва сценарий муаллифи Колин Жостга турмушга чиқди. 2021 йилда эса Йоханссон иккинчи марта она бўлди. Тан бериш керакки, актриса фарзанди дунёга келгунга қадар ҳомиладорлигини моҳирона тарзда яшира олган. Скарлетт қорни сезиларли даражада билина бошлагач, омма эътиборидан қочишга ҳаракат қилган ва ҳатто «Қора бева» фильмининг премьерасида ҳам иштирок этмаган.

Ҳозирда актриса Forbes журнали талқинига кўра, доимий равишда ўн миллион доллар гонорар олувчи Голливуд юлдузлари қаторига киради. Йоханссон 2018 йилда рейтингнинг биринчи поғонасини эгаллаган. У 2017 йилнинг июнидан 2018 йилнинг июнигача 40,5 миллион доллар даромад олган.

Forbes’да қайд этилишича, Йоханссон учун энг кўп даромад келтирган рол «Қасоскорлар» фильми туркумидан бўлган «Қора бева» фильмидаги рус жосуси роли бўлган. Бу рол ижроси орқали актрисанинг даромади 4 бараварга ошган.