“Nort”dan “Qora beva”gacha: amerikalik aktrisa Skarlett Yoxansson 37 yoshda

Bo‘lajak Gollivud yulduzining ismi Margaret Mitchellning “Shamollarda qolgan hislarim” filmi qahramoni Skarlett O’Xara sharafiga qo‘yilgan. Skarlett va uning egizak ukasi Hanter 1984-yil 22-noyabrda Nyu-Yorkda tug‘ilgan. Yoxansson Nyu-Yorkning eng nufuzli va qimmat hududi bo‘lgan Manxettenda tug‘ilib-o‘sgan bo‘lishiga qaramay, bo‘lajak aktrisaning oilasi arang kun kechirgan.

Onasi to‘rt farzandining tarbiyasi bilan shug‘ullangan, otasi esa arxitektor bo‘lgan. Intervyularning birida Yoxansson ular nafaqa asosida yashaganini aytgan. Oilada to‘rt nafar bolani boqish uchun ota-ona kambag‘al oilalarga mo‘ljallangan kupondan foydalangan. Bolaligidanoq ota-onasining janjallariga guvoh bo‘lgan Skarlett chuqur psixologik travma olgan. Keyinchalik ham u “xafa qilishlariga doim tayyor turish” instinkti hali ham unga xos ekanligini tan oladi.

Skarlettning unutilmas, ajoyib bolalik davrlari bo‘lmagan. Skarlett yoshligidanoq Li Strasbergning aktyorlik maktabida ta’lim oladi: kino uning orzusi edi. Ota-onasi ajrashgandan so‘ng kichik Skarlett onasi bilan Los-Anjelesga ko‘chib o‘tadi, lekin u muntazam ravishda otasining oldiga — Nyu-Yorkka kelib turadi. 8 yoshida u “Sofistika” filmining teatrlashtirilgan spektaklida Itan Xouk bilan birga rol ijro etdi, hatto shu yoshda ham uning ajoyib qobiliyatlari ko‘plab kinoijodkorlarga manzur bo‘ldi. 9 yoshida u birinchi marta Rob Reynerning “Nort” oilaviy komediyasida rol o‘ynadi. “Kichik Skarlett bolalarga xos bo‘lmagan iste’dodga ega!”, – degan edi taniqli rejissor.

Skarlett 12 yoshida o‘zining birinchi bosh rolini “O‘g‘rilar” komedik-dramasida o‘ynadi. Buning uchun Yoxansson Independent Spirit Awards mukofotining “Eng yaxshi ayol roli uchun” nominatsiyasida g‘olib bo‘ldi. Bir nechta filmlardagi rollaridan so‘ng 14 yoshli Skarlett Robert Redfordning “Ot shaydosi” melodramasida namoyon bo‘ldi. Nogiron qiz Greys Maklin roli yosh aktrisaga Amerikada katta shuhrat keltirdi. Shundan keyingina aktrisaga ko‘plab takliflar kelib tushdi (“Mavjud bo‘lmagan odam”, “Arvohlar olami”, “Amerikancha qo‘shiq” va boshqalar).

Skarlett Yoxansson 19 yoshida Sofiya Koppolaning “Tarjima mashaqqati” filmidagi rolidan so‘ng, Qo‘shma Shtatlardan tashqarida ham shuhrat qozondi. Mazkur filmdagi Sharlotta roli unga bir qator nufuzli mukofotlarni, jumladan, BAFTA’ning “Eng yaxshi aktrisa” mukofotini ham olib keldi. 2003-yil Skarlett gollandiyalik rassom Yan Vermeyerning xizmatkori rolini o‘ynagan “Marvarid sirg‘ali qiz” dramasida rol ijro etdi. Shu roli sababli “Oltin globus”ga nomzodi qo‘yildi.

Shundan so‘ng Skarlettni taniqli rejissorlar ham o‘z loyihalariga taklif qilishni boshlaydi. U Maykl Beyning “Orol” fantastik jangari filmida, Kristofer Nolanning “Obro‘” trillerida, Vudi Allenning “Match Point” dramasida, Brayan de Palmaning “Qora orhideya” trilleri va boshqa mashhur filmlarda rol o‘ynaydi. “Match Point”dagi rolidan so‘ng 21 yoshli Skarlett Vudi Allenning yangi ilhom parisiga aylanadi va yana ikkita kartina — “Sensatsiya” (2006) va “Viki Kristina Barselona” (2008) filmlarida birgalikda ishlashadi.

2008-yilda Yoxansson “Yana bir Boleyn avlodi” tarixiy dramasida dugonasi Natali Portman bilan birgalikda Mariya Boleyn rolini o‘ynadi. Shu bilan birga, 24 yoshli Skarlett qo‘shiqchi va rejissor sifatida debyut qiladi. Uning birinchi Anywhere I Lay My Head albomi aktrisaning chuqur, maftunkor tembri tufayli musiqa tanqidchilari tomonidan yaxshi kutib olindi. Ammo yulduzning “Nyu-York, men seni sevaman” qisqa hikoyalar to‘plami asosida ishlangan oq-qora qisqa metrajli filmi muvaffaqiyatsizlikka yuz tutib, prodyuserlar tanqidiga uchraydi. Shundan keyin Skarlett bir muddatga rejissorlik faoliyatini tark etadi. Ammo u aktrisa sifatida juda ko‘p filmlarda o‘ziga topshirilgan rollarni qoyilmaqom tarzda ijro etgan. 2010-yilda u “Temir odam 2” filmida maxsus agent Natasha Romanova rolini o‘ynaydi va 2012-yilda u “Qasoskorlar” komiksining ekranlashtirilgan variantida paydo bo‘ldi. Skarlett Yoxansson 27 yoshidayoq Gollivudning Shon-shuhrat xiyobonida o‘z yulduziga ega bo‘ldi.

Skarlett turli loyihalarda faol ishtirok etishni davom ettirdi (“Lyusi” (2014), “G‘ildirakdagi oshpaz” (2014), “Yashasin, Sezar!” (2016), “Qurol sharpasi” (2017), “Juda yomon qizlar” (2017 ), “Quyoncha Jojo” (2019), “Nikoh haqida hikoya” (2019) va Marvel’ning bir nechta filmlarda suratga tushdi. 2021-yilda esa mazkur franshizaning “Qora beva” nomli filmi prokatga chiqarildi.

“Qora beva” lentasi 9-iyuldan boshlab kinoteatrlar va Disney+ da namoyish etildi. Dastlabki dam olish kunlari davomida kartina 218 million dollar to‘plagan. Butun dunyo bo‘ylab kassa yig‘imlari esa 378 million dollardan oshadi. Disney ma’lumotlarga ko‘ra, shuningdek, film prokatning dastlabki 20 kuni davomidagi oqimli xaridlar sabab 60 million dollarga yaqin mablag‘ ishlagan.

Skarlettning shaxsiy hayoti haqida gap ketganda, jurnalistlar uning ko‘plab erkaklar bilan bo‘lgan munosabatlari haqida yozishgan, ammo bularning barchasi ham haqiqat emas. U 2008-yilda Rayan Reynoldsga turmushga chiqdi, ammo juftlik oradan 3 yil o‘tib 2011-yilda ajrashdi. Aktrisaning fransuz jurnalisti Roman Doriak bilan keyingi nikohidan qiz farzand dunyoga keldi, ammo bu nikoh ham ajralish bilan yakunlandi.

2020-yilda Yoxansson uchinchi marta — Saturday Night Live dasturi komik aktyori va ssenariy muallifi Kolin Jostga turmushga chiqdi. 2021-yilda esa Yoxansson ikkinchi marta ona bo‘ldi. Tan berish kerakki, aktrisa farzandi dunyoga kelgunga qadar homiladorligini mohirona tarzda yashira olgan. Skarlett qorni sezilarli darajada bilina boshlagach, omma e’tiboridan qochishga harakat qilgan va hatto “Qora beva” filmining premyerasida ham ishtirok etmagan.

Hozirda aktrisa Forbes jurnali talqiniga ko‘ra, doimiy ravishda o‘n million dollar gonorar oluvchi Gollivud yulduzlari qatoriga kiradi. Yoxansson 2018-yilda reytingning birinchi pog‘onasini egallagan. U 2017-yilning iyunidan 2018-yilning iyunigacha 40,5 million dollar daromad olgan.

Forbes’da qayd etilishicha, Yoxansson uchun eng ko‘p daromad keltirgan rol “Qasoskorlar” filmi turkumidan bo‘lgan “Qora beva” filmidagi rus josusi roli bo‘lgan. Bu rol ijrosi orqali aktrisaning daromadi 4 baravarga oshgan.