АҚШда дунёдаги энг биринчи ядровий сувости кемаси таъмирланади

Дунёдаги энг биринчи ядровий сувости кемаси АҚШда 31 миллион долларга таъмирланади, деб ёзмоқда Defense Brief.

АҚШ денгиз флоти 1954 йилда сувга туширилган ва бир қанча рекордлар ўрнатган дунёдаги биринчи ядровий сувости кемаси USS Nautilus (SSN-571)ни таъмирлаш бўйича General Dynamics Electric Boat билан шартнома имзолади.

Тарихий сувости кемаси Коннектикут штатининг Нью-Лондон порт шаҳридаги базага кўчирилган, у ерда кема тозаланиб, бўялади, янги палубалар ва бортлар ўрнатилади, ички ёритиш ва борт зоналари алмаштирилади, ҳамда бошқа кўплаб таъмирлаш ишларидан ўтказилади. Таъкидланишича, USS Nautilus 20 йилдан буён биринчи марта базага ўтказилган.

Таъмирдан кейин сувости кемаси денгиз тарихи ва мероси қўмондони бошқарувида бўлган музей сифатида қолдирилади.

USS Nautilus (SSN-571) 1954 йил 21 январда сувга туширилган ва 1980 йил март ойида фойдаланишдан чиқарилган. Ўз хизмати давомида у инсоният тарихида сув остидаги муз қопламаларини босиб ўтиб, Шимолий қутбга етиб борган биринчи сувости кемаси бўлди. У илгари сувости кемалари бўлмаган жойларга етиб борди. SSN-571 жамоаси хизматлари учун бир нечта мукофотларга сазовор бўлган, 1982 йилда сувости кемасининг ўзи АҚШнинг миллий тарихий ёдгорлиги мақомини олган.

Эслатиб ўтамиз, АҚШ Ҳарбий денгиз кучларининг USS Connecticut ядровий сувости кемаси 2 октябрь куни номаълум объект билан тўқнашиб кетганди. Кейинроқ маълум бўлишича, тўқнашувга  сув остидаги қоя сабабчи бўлган.