Samarqandda savdo markazida xotini va uning jazmanini pichoqlab o‘ldirgan erkakka sud hukmi o‘qildi.
Eslatib o‘tamiz, 2020-yilning 20-noyabr kuni soat taxminan 18:00 larda Mirzo Ulug‘bek ko‘chasida joylashgan savdo markazida 42 yoshli pastdarg‘omlik erkak do‘konda turmush o‘rtog‘i va uning o‘ynashi deya taxmin qilingan shaxsga duch kelgan va odamlar orasida ularga pichoq bilan tashlangan edi. Jabrlanuvchilar qon ketishi oqibatida voqea joyida vafot etgan.
Jinoyat ishlari bo‘yicha Samarqand viloyati sudining “Daryo” so‘roviga asosan ma’lum qilishicha, sudlanuvchi M.A. dastlab ayoli bilan ushlab olgan erkak — R.E.ning hayot uchun muhim bo‘lgan yuz, bo‘yin, qorin sohalariga, so‘ng turmush o‘rtog‘i Sh.A.ning bosh, bo‘yin, qorin sohalariga ko‘plab sanchilgan-kesilgan tan jarohatlari yetkazib, ularni qasddan o‘ldirgan.
M.A. ayoli Sh.A. bilan 2006-yilda qonuniy turmush qurgan, uch nafar farzandi bor. 2012-yil aprel oyida ular Rossiyaga ishlashda ketgan, farzandlari onasining qaramog‘ida qolgan. Ayoli pasportini yo‘qotgani sababli 2016-yilda O‘zbekistonga qaytgan, erkakning o‘zi ham O‘zbekistonga kelib davolanib ketib, 2019-yil 16-iyul kuni yana qaytib kelgan.
2019-yil iyul oylarida oilasi bilan muzqaymoq yegani borishganida turmush o‘rtog‘i do‘kon sotuvchisi E.R. bilan ko‘z urishtirishganini ko‘rib, ular o‘rtasida biror gap borligiga shubha qilgan. Bu haqda turmush o‘rtog‘idan so‘raganida o‘rtalarida hech qanday aloqasi yo‘qligini aytib qasam ichgan.
2020-yilning yanvar oyida turmush o‘rtog‘ining telefonini tekshirganida, Telegram’da R.E. bilan ishqiy mazmunda yozishgani, bir-birlariga ishqiy suratlar va yalang‘och ayollarning suratlarini yuborishganini ko‘rib, ular o‘rtasida ishqiy munosabat borligiga ishonch hosil qilgan.
Oradan ancha vaqt o‘tib, turmush o‘rtog‘i Sh.A. telefonda gaplashib o‘tirganini ko‘rib kim bilan gaplashayotganini so‘raganida, u opasi bilan gaplashayotganini aytib, telefonini unga bermasdan, o‘zini olib qochgan. Shunda er kuch ishlatib, turmush o‘rtog‘ining qo‘lidan telefonni tortib olib, uni yana R.E. bilan gaplashayotganini bilib qolib, urgan.
O‘sha yilning sentabrida ham ayolining telefon apparatini tekshirganida uning R.E. bilan gaplashayotganini bilgan, ammo turmush o‘rtog‘i u bilan ish yuzasidan gaplashgani, boshqa hech qanday gap-so‘z yo‘qligini aytgan. O‘sha yilning noyabr oyida ayol oilaviy janjal sabab uyiga ketib qolgan va eri bilan boshqa yashamagan.
2020-yil 20-noyabrida M.A. ayoli R.E.ning mashinasiga o‘tirganini ko‘rib qolgan va turmush o‘rtog‘i bilan nikohdan ajrashmagan bo‘lsalarda, ochiqdan ochiq unga xiyonat qilayotganidan jahli chiqib, uyiga kelib oshxonadan plastmassa dastali pichoqni olib, ularning ortidan kuzatib borgan va do‘konga kirganlarida ularni pichoqlab tashlagan.
Sudlanuvchining so‘zlariga ko‘ra, jahl ustida bo‘lgani uchun o‘zini yo‘qotib qo‘yib, kimga necha marotaba urganini eslay olmaydi. O‘ziga kelgan vaqtida qo‘llari qon bo‘lib, qo‘lida pichoq turganini ko‘rgan. Yo‘lovchi mashinada uyiga borib, o‘g‘liga onasini boshqa erkak bilan ushlab olib o‘ldirganini aytib, hayrlashgan. So‘ng akasi bilan ixtiyoriy ravishda Samarqand viloyati IIBga kelib, tergovga bor haqiqatni aytib bergan.
U sodir etgan jinoyatiga to‘liq iqrorligi, qilgan ishidan pushaymonligi aytib, suddan unga qonuniy yengillik berishni so‘ragan.
2021-yilning 24-fevral kuni Samarqand viloyat sudi fuqaro M.A.ni Jinoyat kodeksining 97-modda (qasddan odam o‘ldirish) 2-qismi “a” va “j” bandlarida sodir etilgan jinoyatlarni sodir etganlikda aybdor deb topgan. Sud hukmi bilan unga 22 yil ozodlikdan mahrum qilish jazosi tayinlangan.
Avvalroq Samarqandda qo‘shni ayolga 17 marta pichoq urgan erkakka hukm o‘qilgani, Qashqadaryoda o‘z ukasining oyoq-qo‘llarini sim bilan bog‘lab, tiriklayin yoqib yuborgan aka ushlangani, Namanganda eri voz kechgani uchun ovsinining qizini kanalga cho‘ktirib yuborgan ayolga sud hukmi o‘qilgani to‘g‘risida xabar berilgandi.
Izoh (0)