Ўзбекистонда Renault автомобиллари расман сотувга чиқди. Бу ҳақда ушбу компаниянинг маҳаллий ҳамкори — Roodell компанияси матбуот хизмати хабар берди.
Фото: «Дарё» / Мадина Нурман
Renault Ўзбекистонда учта модель — Arkana купе-кроссовери, Kaptur шаҳар кроссовери ва Duster янги авлод йўлтанламасини чиқаради. Ҳозирда сотувда фақат иккита модель бор — Renault Arkana ва Renault Kaptur.
Renault Uzbekistan сайтида келтирилишича, Arkana купе-кроссовери учта комплектацияда таклиф этилади:
- Life — 239 046 500 сўмдан;
- Drive — 262 759 200 сўмдан;
- Style — 281 947 800 сўмдан.
Kaptur шаҳар кроссоверининг ҳам учта комплектация тури мавжуд:
- Life — 228 937 300 сўмдан;
- Drive — 252 650 100 сўмдан;
- Style — 276 518 900 сўмдан.
Йўлтанламас Duster нархи ҳали эълон қилинмаган.
Renault автомобиллари нархлари октябрь ойининг ўрталарида ҳам эълон қилинганди. Аммо расмий вакиллар бу нархлар якуний белгиланган нархлар эмаслиги ва унда ўзгаришлар бўлиши мумкинлигини билдирган.
Эслатиб ўтамиз, Ўзбекистонда Франциянинг Renault автомобилларини йиғишни йўлга қўйиш режалаштирилаётгани 2020 йилнинг охирларида маълум бўлганди. Бу ҳақда 2021—2023 йилларга мўлжалланган Инвестиция дастури тасдиқланган Президент қарорида келтирилган.
Ўзбекистонлик харидорлар учун автомобиллар ADM-Jizzakh заводида йиғилади. Бу ерда Renault’дан ташқари Кiа ва Lada ишлаб чиқарилади. Президент Шавкат Мирзиёев 21 октябрь куни мазкур заводга ташриф буюриб, иш жараёнини кўздан кечирганди.
